Partido cu tabata contra islanan Aruba , Corsou y Sint Maarten a perde eleccion paso ta hopi di lamenta cu tin partido ta pensa di haci algo asina contra nos paisnan segun Sr. Andin Bikker. E populismo di VVD, cu lo mester a bira e partido mas grandi segun encuestanan, no a cristalisa su mes y esey ta algo hopi bon. Su lider no ta pro Reino Hulandes y e kier a basicamente desmantela Reino Hulandes.
Partidonan cu tin un curason grandi pa Aruba, manera Groen Links, D66 y CDA den nan programa di gobernacion a expresa cosnan positivo pa Reino Hulandes y Aruba, Corsou y St.Maarten y a crece den asiento. PvdA lastima cu a perde nan asiento ya cu varios di nan votadonan no a compronde cu nan mester a tuma cierto pasonan pa sanea e economia. Ta algo positivo cu VVD a keda e partido mas grandi y ta un partido habri pa combersacion.
Hopi di Sr. Bikker su amiendanan a wordo acepta door di VVD y esey ta algo positivo. Lo bay tuma un tiki tempo prome cu forma gobierno ya cu tin hopi partido cu lo mester acomoda nan mes.
Na Januari Sr. mr. Bikker tabata tin un test case den Corte pero Raad van State no a bay di acuerdo cu esaki. Aworaki ta bezig cu apelacion den Corte Europeo y varios hurista ta formulando esaki y ta spera cu pa otro eleccion lo por tin derecho pa vota den Tweede Kamer ya cu hopi decision cu ta regarda Aruba ta wordo tuma den Rijksministerraad, sin cu Aruba tin algo di bisa over di esaki.
Campaña na Hulanda contra de partido den gobierno, tabata cu nan a hinca Hulanda den debe, y e mesun situacion ta pasando na Aruba, pero segun Sr. Bikker, VVD y PvdA a logra di tin begrotingsoverschotten, pero na Aruba esaki ta tur lo contrario. Na Hulanda e Minister President ta asumi su responsabilidad y ta enfrenta su problemanan. Pero esun di Aruba, ta den bario e ta cana y ta pega luz y ta haci cura di hende limpi na casnan bandona.
E no ta asumi su responsabilidad, tin criminalidad y atraconan tur dia, insiguridad y enseñansa mester atencion, y e Minister President ta visiblemente ausente, cual segun mr. Andin Bikker, ta algo di lamenta.