Diahuebs a tuma luga den Corte di Husticia e caso caminda e conocido locutor DJ OZ lo mester a bin tuma su sentencia.
O.L.J. miho conoci como McOz a keda condena na 18 luna di prizon, kitando e tempo cu el a keda caba den aresto preventivo. Hues ta haya cu a keda legalmente proba cu O.J. a tene relacion cu un mucha muhe menor di edad (14 aña). Segun Hues, leynan t’ey pa proteha derecho di un mucha. No ta paso cu e ta aparenta di ta mas grandi, esey automaticamente ta dunabo e derecho di tene relacion sexual cun’e, aunke e ta consensual. Den e caso aki, Hues no ta kere of no ta tene cuenta cu e hecho cu OJ a bisa cu el a kere cu e mucha muhe ta un adulto caba.
Varios biaha e mucha tabata bisa OJ cu e no por sali, pa motibo cu e mama no ta dun’e permiso. Eynan caba e mester a pensa cu e mucha ta un menor di edad. Tambe, e hecho cu OJ no a uza proteccion, cual tabata tin su consecuencianan, unda cu e mucha mester a comete abortus. Si hues a di opinion cu e dj awo si a siña su les y cu esaki lo no ripiti mas.
“Siguiente biaha cu’n persona hay’e den un situacion asina, e lo pensa dos biaha prome cu e haci algo asina”. Asina aki tambe hues ta uza e caso di e locutor aki como ehempel pa otronan. Sigur no un persona cu ta popular bou di e hubentud y tambe den comunidad di Aruba. Esaki ta un caso cu a shock e comunidad di Aruba.
Ta di remarca cu hues a desvia for di e castigo pidi door di Fiscal, cual tabata di 18 luna condicional, di cual 6 ta condicional. Sinembargo hues no a haya necesario pa un castigo condicional, pero a hisa e castigo na 18 luna completo, kitando asina e tempo cu ya el a pasa den detencion preventivo.