Na September 2013 mi a scirbi un articulo cu tabata referi na e posicion precario cu e siguiente generacion lo bay wordo confronta cu n’e pa e maneho devastador di e gobierno actual a bin ta eherce. Mi a señala cu NOS TUR tin cu corda cu e lucha y trabou cu nos mester haci, no ta pa e siguiente eleccion, pero pa e siguiente generacion. E mensahe di UPP sinembargo no a wordo comparti pa e electorado hoben na 2013 y ni tampoco esun di dia 22 di september ultimo, y UPP ta respeta e resultado aki.
Loke ta preocupa nos di UPP masha hopi ta e comportacion infantil y peligroso cu e lider politico di AVP a asumi, despues cu e resultado di e eleccion a duna su partido e mayoria atrobe, pero den e mesun rosea a rechasa e maneho cu a ser implementa e ultimo 8 aña. Sr. Eman no por a acepta cu e electorado a propina su partido un perdida formal di voto y di asiento, mientras ya caba e otro partido político cu tambe a logra asiento a duna di conoce cu no lo kier forma un gobierno cu su partido.
Enbes di a pensa riba e interes general di nos pais, sr. Eman a tuma un postura vengativo y intransigente. Ela cuminsa ta instiga e fanaticada fiel di su partido, cu ela faborese grandemente durante su “reinado”, como tambe e personanan di descendencia latino cu y sin derecho di voto pa sigui’e den su intento pa crea chaos y desordo riba nos pais. Ya caba su amigonan di e prensa comprometi a cuminsa ta lansa tur sorto di calumnia cu e meta pa desacredita cierto candidatonan cu a logra asiento den parlamento y lo por wordo involucra den formación di e siguiente gobierno.
Sr. Eman y su compichinan sin embargo parce cu ta asina desespera cu nan no ta comprende cu instigacion y segregacion lo por hiba na confrontacionan serio entre e fanaticada di e diferente partido politico di tal forma cu hasta morto lo por cay. P’esey UPP ta urgi tur otro lider politico pa no cay den e trampa di Sr. Eman. Lagu’e “smoor den su vet” y laga sano huicio prevalece den bienestar di nos henter nos pueblo y principalmente pa e siguiente generacion.