Sub Inspector, sr. Johnny Henriquez ta elabora tocante e desaroyonan cu Polis ta tumando pa cuida nos turismo.
Sr. Henriquez ta splica cu nan ta trahando riba algun plannan pa ataca e problemanan aki. Durante dia ora haya e masa di turistanan di barco crucero cu ta bishita diferente destinacionnan, nan ta pone autoridad visibel den e areanan ey. Esaki ta sosodiendo na Arashi, Eagle Beach y un parti di Bushiri tambe. Nan ta pone autoridadnan di districto Noord pa ta visibel y uniforma den a areanan aki. Nan tin e Strand Politie cu ta destina pa vigila e zonanan mas cerca di hotelnan. Tur esaki ta durante dia. Tambe nan ta asigna autoridadnan tur anochi den e hotzone di hotelnan pa prevencion, cual ta bayendo bon, segun e Inspector. Na cierto barionan cu casnan cu turistanan ta huur, tin ladronicianan cu ta tuma luga. Nan tin un plan pa cu esaki cu falta algun detaye pa por ehecuta mas pronto cu ta posibel. E ta mustra cu e poco personal cu tin ta haciendo nan esfuerso pa desaroya e plannan aki. Tin un grupo grandi di nan personal cu ta deal cu e securitynan di tur e hotelnan unda cu nan ta papia di e problematicanan di cada hotel y con pa atende cu e problemanan ey. E ta funciona enormemente bon, segun e Inspector, pasobra nan ta haya cosnan cu nan no tabata sa di dje por medio di e securitynan cu ta yuda amplia e zonanan. En cuanto e camaranan, nan ta wardando riba algun decisionnan cu mester wordo tuma prome cu por ehecuta esey. E ta algo masha ideal pa Aruba uza esey pa su areanan turistico.
Pa loke ta e securitynan, nan kier mehora nan practica di e funcion aki por medio di cursonan pa nan ta mas atento pa cu situacionnan sospechoso. E Inspector ta mustra cu tur hende mester duna nan parti tambe pa yuda proteha nos turismo. Awor tambe cu tin e Beach Policy, hopi cosnan a wordo bon structura.