Concientisacion ta un metodo esencial cu tur instancia ta haci uso di dje, pa educa of miho bisa, pa recorda un grupo di hende riba un topico cu kisas nan no tabata sa of cu nan a lubida riba dje. Minister Dowers a splica cu e metodo aki, su ministerio a bin ta haci uso di dje desde cu su persona a wordo encarga cu e cartera di Husticia, y e ta un metodo cu su persona sa sigur cu e ta duna su resultadonan positivo. ‘Un di e ehempelnan cu nos por duna sigur, ta e concientisacion cu nos a bin ta haci durante casi 8 aña largo, pa awe nos tin un trafico hopi mas sigur, compara cu algun añanan pasa’, Minister Dowers a comenta. E no ta cuestion di haci esaki un pa dos dia y el a caba, pasobra e ta tuma su debido tempo. E unico cos fastioso di esaki ta, cu bo no lo bay mira su resultado a corto plazo, pero mas bien si riba un termino mas largo y su bentaha ta, cu e ta uno duradero.
Minister Dowers a remarca cu el a tuma nota, for di belastingdienst, esta servicio di impuesto di Aruba, cu tin 20% di personanan cu ta doño di un vehiculo di motor, cu ainda no a haci pago di nan belasting di nan vehiculo di motor cu nan tin den uso. Mirando cu nos polisnan ta hopi activo cu nan controlnan riguroso den tur skina aki na Aruba, e titular di husticia kier a participa na nos comunidad, pero en especial e 20% cu ainda no a regla nan impuesto di vehiculo di motor, pa nan tene bon cuenta cu esaki. Segun por a compronde for di servicio di impuesto cu nan tin un plazo te cu dia 29 di Mei 2017, pa e 20% di personanan cu nan ta referi na dje y cu ta representa 15.228 plachi di number, cu nan por pasa e oficina pa regla un cu e otro ainda.