Polis na mesa cu partidonan politico

1

Diaranson ultimo a tuma luga un reunion entre Cuerpo Policial Aruba y tur partido politico, cu lo participa na e siguiente eleccion Parlamentario di nos pais. A forma un comision den Cuerpo Policial, encabesa pa Comisario Irma Gordon hunto cu Alto Inspector Adrick Croes. E reunion a tuma luga na Centro di Husticia na Santa Cruz.

Motibo di e reunion tabata relaciona cu e temporada di eleccion Parlamentario cu ta nos dilanti. A invita representante di tur partido politico pa sinta na mesa pa cuminsa pasa dor di varios punto, specialmente e condicionnan cu Polis ta pone pa eventonan politico durante e temporada aki di campaña electoral.

Meta di e reunion ta pa tur hende ta riba mes un liña ora di haci peticion pa actividadnan. A informa tur partido politico cu lo mester haci peticion pa organisa actividadnan politico na Centro di Husticia na Macuarima. Na ningun otro Warda di Polis ta acepta dicho peticion y mester tene na cuenta cu mester ta por lo menos 7 dia di trabou adelanta, pa por procesa e peticion y regla e permisonan necesario.

Pa Cuerpo Policial, ta importante cu durante e temporada aki y durante tur evento, ta tene cuenta cu siguridad den trafico y orden publico.

Lamentablemente no ta tur partido politico a manda representante. Ta spera cu den e siguiente reunion, programa pa tuma luga aki dos siman, cu e ora si lo bin representante di tur partido politico. Te cu awor tin registra 10 partido politico cu tin pensa di participa na eleccion Parlamentario dia 22 di september 2017, mientras cu ainda ta pendiente pa 2 partido mas.

E reunion a bay den bon ambiente. Cada partido a haya un bon oportunidad pa haci preguntanan y asina purba pa tur cos bay bon den e temporada nos dilanti. Ta intencion pa tene e reunionnan aki cada 2 siman pa asina por evalua y analisa unda por mehora y si tin pregunta pa por trece dilanti mesora, den cuadro di tin bon comprondemento.

Cuerpo Policial ta boga pa tur cos bay mas trankil posibel den e temporada aki y cu ta respeta cada ken nan opinion.

Cu e tipo di reunionnan asina, Cuerpo Policial ta promove mas transparencia, cooperacion mutuo y mustra disponibilidad pa por acomoda deseo di tur partido envolvi, semper y cuanto cu orden publico prevalece. Polis ta mira e partidonan politico como un berdadero partner durante e temporada aki. Ta hunto nos lo por percura pa un campaña electoral sin incidente, cu respet pa opinionnan di otro y pa hunto nos celebra democracia riba nos isla.

1 COMMENT

  1. Na prome lugar mester elimina paradanan politico, pasobra nos mester ta realistico, cu na Aruba no tin mas espacio pa esey. E trafico na Aruba ta sobrecarga. Ora di pone actividad nn para, dus na cas of establesimento mes ta pone cu e trafico ta tranca na e bario ey. Dus si pone parada politico ta pone cu full Aruba ta pega, ban ta serio. Corda cu nos tin turista cu ta jega cansa despues di un vuelo larga y kier jega hotel mas lihe cu ta posibel. Tambe esun nn cu tin cu regresa aeropuerto tin nan schedule. Sin conta nos mesun hendenn local cu mester jega trabow of bai cas despues di trabow. Dus hendenn bin bij…..

Comments are closed.