Willemstad Curacao: Alrededor di 19.30 or di anochi, durante patruyahé di personal di Tim di Mantenshon i Órden Públiko den área di Seru Grandi a topa ku un outo sospechoso pará. Polis a bai hasi un kontrol na e vehíkulo pero e shofúr a purba koré bai despues ku polis a duné na diferente okashon òrdu pa pará. E shofúr no kier a koperá ku e kontrol i polis a detené na e sitio e hòmber aki, R.R.M. nasé na Kòrsou di 30 aña di edat. A presentá e sospechoso dilanti un Fiskal ouksiliar.
Diripiente un pikòp a kore bini den direkshon di e patruyá pero a para na un distansia i dos hòmber a baha kana bin serka e agentenan polisial. Polis a hasi un kontrol riba violashon di Lei di Opio i Arma di Kandela, den e pikòp polis a haña i konfiská un arma di kandela modèl Glock 17. Relashoná ku esaki polis a detené e hòmbernan I.O. di 34 aña di edat i J.T.E. di 28 aña di edat, ámbos nasé na Kòrsou komo sospechoso pa violashon di Lei di Arma di Kandela.
A presentá ámbos sospechoso dilanti un Fiskal ouksiliar ku a ordená nan enkarselamentu pendiente di mas investigashon.