Polis tabata atendiendo un caso di siman pasa dia 19 di October cu un huesped di e crucero Monarch a horta celular di un ciudadano na Hamaca Café. Polisnan Maritimo a haya descripcion y un potret di camara di e establecimento. Mesora a notifica na e cuerpo di siguridad na waf y tambe na siguridad di e crucero. Nan a tira bista riba barco y a haya e sospechoso cu tabata cuadra cu e descripcion duna y consecuentemente a haya e celular i-Phone tambe! E sospechoso a declara cu e la hay’e “benta abao”. Siguridad di e barco no a haci e pasahero nada, pero e siman aki ora Monarch a yega Aruba bek, e miembro di siguridad a bay entrega e celular bek na e oficina di Polisnan Maritimo situa riba tereno di waf di Playa. Na su turno e Polisnan a yama e doño di e celular, un señora di fam Rasmijn-De Cuba cu a keda masha contento cu e esfuerso di e Polisnan pa logra recobra su pertenencia. A avis’e cu si e entrega un keho, lo pidi Polisnan di Corsou pa detene e pasahero asina cu e barco mara na nos isla ruman, pero e victima a laga sa cu e tabata mas interesa pa recobra su celular bek y no kier a entrega keho penal contra e sospechoso. Cu e testimonio aki ta importante subraya cu ora bo bira victima di un caso di ladronicia, semper entrega un keho mesora, pasobra Polisnan tin hopi forma con pa yega na evidencia pa por logra persigui e sospechoso envolvi. Den e caso aki camara di siguridad a duna un bon man, cu awor e doño di e celular a evita un gasto inespera pa un celular nobo.