“Mas cooperacion nos haya di comunidad, mas lihe nos por actua, mas eficiente y cu mas exito”, asina Sub Inspector di Polis, Lito Lacle, encarga cu e departamento di Comunicacion, Informacion y Prevencion di Cuerpo Policial Aruba a duna di conoce. E ta referi na e detencion relampago cu a haci diabierna mainta na Sasaki Apartments.
Tabata diahuebs cu habitantenan di un cas na Moko a entrega keho di ladronicia na Polis. Ladronnan a drenta e cas y a horta practicamente tur cos!
Despues di e keho, e ekipo special di “Woninginbraken” di Recherche a activa y a cuminsa investiga e caso. A haci uzo di e informacionnan entrega, e pruebanan, a scucha testigonan, bisiñanan y compila informacion via nan red di inteligencia pa asina mira con lihe por logra yega na e ladronnan. Den esey ta uza tambe informacion y tipnan cu ta drenta di pueblo.
Asina diabierna mainta 8:30am, recherchenan a detene 3 sospechoso, di cual 2 hende homber y 1 hende muhe. Tur tres ta di nacionalidad Colombiano y ta permaneciendo como turista den apartament.
E trio a haci uzo di un auto di huur, V-2362, un Hyundai Tucson colo blauw, pa nan por transporta e articulonan horta.
Mester menciona cu e recherchenan a logra haya mayoria si no ta tur e articulonan horta. Di e forma aki ta demostra cu ora tin sosten y cooperacion di comunidad pa suministra tip na Polis, cu por soluciona e casonan mas efectivo y mas lihe.