Den un esfuerso pa garantisa siguridad riba lama y pa preveni cu ta importa articulonan ilegal na nos isla, e departamento di Polisnan Maritimo a tene un control riguroso diadomingo ultimo riba lama, specificamente cu e botonan cu “a bay zuid” bin bek.
Anualmente na luna di September ta tuma luga un actividad na Venezuela masha bon bishita pa botonan di Aruba, esta e “Virgen del Valle”. Diabierna ultimo dia 9 di september a sali un total di 12 boto for di nos isla pa bay atende e actividad. Mayoria a regresa diadomingo mes bek, pa cual Polis a spera riba nan pa garantisa cu nan no ta purba importa nada ilegal.
E botonan cu Polis a para y a guia pa waf di Barcadera pa realisa un control riba nan tabata A-6 Renegade, A-1192 Occeana, A-225 Envy, A-868 No Excuse, A-780 Gigetto, A-1975 La Verraca, A-1511 Renegade, A-312 Just do It, A-90 Chill out, A-2066 Ola Bebe y A-1606 Orian.
Mester menciona cu e Polisnan Maritimo a haya sosten tambe di nan coleganan di Warda Costa di Caribe Hulandes y tambe di Cuerpo di Aduana, pa hunto efectua e control den forma mas lihe, eficiente y riguroso posibel.