Patruya a cuminsa cu nan control na Eagle Beach y tambe den e zona di high rise hotel. A controla prome Eagle Beach, mirando cu ta druk tur diadomingo. E luga tabata hopi bon bishita y tabata tin varios grupo cu nan autonan deportivo den e vecindario. Tabata tin varios di e doño di varios di e autonan, a wordo atendi pa polis, riba e volumen di nan speaker. Una bes cu a constata cu esaki tabata demasiado halto, nan a wordo poni na altura pa baha esaki y mustra nan pa baha esaki y si nan no cumpli cu e ordo aki, cu nan lo wordo desaloha. A papia cu tres conductor, kendenan a mustra comprension y a indica cu nan tabata bezig ta ruim op. A controla tres biaha rond di Eagle Beach y por a nota cu e bishitantenan tabata busca caminda pa cas. A sigui controla desde Riu Hotel pa The Village Mall y South Beach Mall den e vecindario. Pa mas of menos 7’or y 45, Central a manda polis na un high rise hotel pa un caso di destruccion. A tuma keho eynan. Mientras cu polis tabata bezig na e hotel, dado momento nan a bay den e camara room. Na entrada di e casino, tabata tin dos mucha muhe cu no tabata mas bieu cu 10 aña para pafo. Polis a keda mas of menos 30 minuut den e camara room. Ora cu a bay bek na e casino, e mucha muhenan ainda tabata pafo. Polis a sigui cu nan trabao y ora nan a keda cla, nan a cerca e dos mucha muhenan y nan a conta na Spaño cu nan tabata wardando riba nan wela. Nan a conta tambe cu nan ta di bishita cerca nan wela cu ta biba Aruba. E mucha muhe di mas bieu a duna descripcion di nan wela. Polis a controla e casino y nan a topa cu e muhe yama D. El a admiti berdad cu e ta cu su dos nietanan chikito. El a indica cu nan ta cu vakantie y mirando cu nan tabata kier a bay den pool, pero nan no tabata por. E la laga nan pafo un a bay den e casino un rato. Puntrando for di ki ora e tabata den e casino, el a indica cu desde 6’or di atardi. Tabata casi 9’or ora cu a atende cu e dama. Mirando esaki, polis a atende e caso aki y a mustr’e cu door cu no a hay’e, polis lo hiba e dos muchanan na warda y pone personal di voogdijraad na altura. El a indica cu e ta sinti su mes bergonsa y cu esaki ta prome biaha y cu e no lo haci esaki mas. Una bes cu el a wordo atendi, el a wordo manda cas y pa percura pa su nietanan. Tambe a bisa D. pa bay luganan caminda cu muchanan chikito ta permiti y si e kier bay casino percura pa un hende percura pa e nietanan durante e momento cu e no tey. El a mustra comprension pa esaki. Comandante na warda a wordo poni na altura.