Segun director di APA, Jossy Figaroa, awor aki nan ta den e fase final di e ultimo plan, e masterplan cu ta bay bira. A papia cu gobierno y a pidi pa haci algun adaptacion. Gobierno kier mas parke cu APA mes a kere cu tabata necesario. Gobierno no ta gusta e idea cu entre e boulevard cu ta bin y e costa, ta bay tin e edificionan y tampoco F&B. Pesey tin cu papia un biaha mas cu Gobierno. Awor aki ta bay calcula cuanto e gastonan cu tin cu bay haci manera traha e Linear Park, pa traha e parke cu ta bay ta riba e boulevard y a base di esey ta presenta e plan na Gobierno. No ta duda cu esaki lo bay haya hopi problema pasobra ta canando e caminda regularmente, caminda cu ta touch base cu Gobierno y e ta bayendo bon. Tin cu bisa cu hunto cu Port of Amsterdam, kendenan tin basta experiencia tambe pa e transicion di un waf pa locual cu a sosode na Amsterdam, unda cu nan a hinca e waf di Amsterdam, den e stad di Amsterdam. APA tambe kier purba di integra e waf di Aruba, hunto cu e centro.
Esey ta nifica cu ta bay traha riba cosnan cu ta complementa e actividadnan cu tin y no cu ta competi cu otro. Esey ta algo cu Gobierno a bisa di comienso. Por haci hopi cos den waf, pero no por haci algo na unda cu ta bay kibra e centro di Oranjestad.
Segun Figaroa, un di e cosnan cu APA a trece dilanti pa Gobierno, cu tin di compronde cu e luga unda cu Bushiri ta awor aki ta, lo bay keda liber. Tin un mocion den Parlamento unda cu a pidi pa bay haci un stacion pa deportenan di beach. Pero ta kere ta bon pa Gobierno tira un bon bista riba esey, como cu por a mira algo asina na Bahamas y si no mantene debidamente e por keda algo cu por bay keda mahos. Por bay wak kico a pasa na Bahamas y no mester ripiti esaki.
Recientemente tabata tin un actividad di beach tennis y e tabata bunita y segun Figaroa, mester sigui haci algo asina. No pone un luga completamente disponibel pa esey so, pero mester por combin’e. E mester por ta un parke y ora tin evento, bo mester por cer’e y tene y despues habri’e bek y laga e hendenan sigui gosa di e sitio. Ta bay tin un luga unda cu por tene evento, pero eventonan no di e magnitud manera cu tabata custuma haci’e riba tereno di waf manera concierto. No ta kita cu banda pabao, unda cu Bushiri ta awor aki, haci algo bunita di dje, caminda cu por cere y tene eventonan grandi, manera cu tabata tuma luga den e ultimo añanan riba nos waf.