Den luna di juni Gobierno di Aruba, Ministerio di Desaroyo Teritorial, Infrastructura y Medio Ambiente a publica e maneho cu lo wordo hiba pa e añanan 2018 te cu 2021 pa locual ta nos medio ambiente. E Beleidsnota “Onze Natuur & Ons Milieu, op weg naar een evenwichtige toekomst”, a wordo realisa por medio di colaboracion di departamentonan den Ministerio, pa cual Directie Natuur en Milieu (DNM) a haci e trayecto previo den 2014 y e aña aki Ministerio a haci algun adaptacion y revision pa reforsa e plan.
Den e beleidsnota balans y colaboracion entre tur partido envolvi ta temanan sumamente importante. Tur partido tin un tarea specifico pa haci y sin balans y colaboracion estrecho entre partners cu tin un vision colectivo, e maneho no ta posibel, cual ta e enfoke di e nota aki. Sin lubida e aspecto di tin un acercamento activo y pragmatico pa cosnan tuma luga.
Interesante pa trece dilanti ta cu a uza un metodologia di SWAT, unda cu ta haci analisis di ‘strength, weaknesses, traits and opportunities’. Enbes di a skirbi un documento hopi largo di 600 pagina, a enfoca riba un acercamento pragmatico unda cu a scoge e temanan actual (for di 10 tema di prioridad a scoge e prome 4). A base di esaki a haci un SWAT y a formula strategianan y enbes di a skirbi un plan cu solamente texto a pone accion concreto.
Den pasado diferente investigacionnan a wordo haci, sinembargo ta prome biaha cu ta lansa un plan asina aki. E nota ta uno dinamico poni pa e periodo di 2018 pa 2021, pero esey no ta significa cu cambionan no por wordo haci den e periodo aki. Den e tempo cu nos ta bibando aden, no ta factibel pa skirbi un plan cu e meta pa e dura 40 aña. E aspecto dinamico ta haci cu e plan ta mas realistico considerando cu cambionan globalmente cu ta tumando lugar hopi mas liher. E plan aki por wordo adapta a base di e necedidad cu tin na dado momento. Pa esnan cu no a mira esaki, e documento completo ta disponibel por medio di e link aki: https://goo.gl/Ffh1HX of riba e Pagina di Facebook di Ministerio di Infrastructura y Medio Ambiente.