Diabierna anochi den un bon ambiente na Tumazu Sports Bar, Pizza Hut Predators a bautisa uniform nobo. Princesitanan Sylvienne Ridderstap y Jasmine Nobrega a bautisa e bunita uniform berde cu preto “design by Papo Sportwear”. Escuadron di Predators cu a keda funda na november 1991 e aña aki ta celebra 25 aniversario. Na e ocasion aki e ekipo cu mas titulo di King of the Caribbean lo bay midi forsa cu Campeon di Curacao Maishi Tigers, Campeon di Bonaire Sharp Shooters y Bad Breaks ekipo nobo na Corsou cu a perde e final di Tigers e aña aki. Hut Predators a logra su prome titulo campeonil na aña 2000 como Millenium Champ y despues ta domina billiard na Aruba conquistando un total di 10 titulo nacional entre 2000 y 2015. E logronan no ta keda eynan so ya cu Hut Predators a domina e magno evento di biĺliard internacional, King of the Caribbean, ganando e torneo na Corsou 2005, 2006, 2008 y na Aruba na 2009. Ekipo aki cu pa 25 aña ta dirigi pa Ditto Acosta ta conta cu e legendario Edwin Chirino cu tin 20 aña militando den ekipo. Durante transcurso di decadanan a bin hobennan manera Marc Farro y Jorshua Ras cu a yuda mantene ekipo den top. Ultimo añanan ta e cachonan brabo cu a reforsa e team pa duna un spirito nobo, George Nobrega, Mitchell Kelly, Andy Geerman, Armand Ridderstap, Maikel Maduro, Raymond Eckmeyer y Colin Nobrega. Otro hoben talentoso cu ta forma parti di Predators ta Marlon Tromp y e peligroso “Siriano” Roukous Dannary. Fanaticada di billiard ta invita diahuebs 27 y diabierna 28 di October na Pova Club unda lo start e semi final di campeonato FEBIAR. Diabierna 11 di November e Predatornan lo sali riba Insel Air rumbo pa Corsou unda lo defende bandera di Aruba den e grandioso “8-Ball Challenge of Champions”. Team Predators kier gradeci nan fiel sponsor PIZZA HUT y gerente Sr. Glenn Croes.