Play Off final HEINEKEN di Aruba Softball Bond dedica na legendario Minguel Tromp y Emelina “Mamai” Loopstok a continua diaranson ultimo riba veld di Kudawecha. Cu e serie di best out of 5 empata na uno e wega number tres tabata un wega hopi importante pa ambos ekipo. E ganador lo bay ariba 2-1 den e serie mientras e perdedor lo keda lomba contra muraya. Richinell Matos a habri pa Pizza Hut Monsters y a bay 8 inning completo pa pone un otro victoria riba su nomber. Jomark Flanegin a inicia pa Royal Power y a tira 4 inning solido pero den 5 inning ta wordo releva pa Jair Thompson kende a wordo releva bek pa Kelvin Silvania kende na su turno ta wordo releva bek pa e pitcher habridor Jomark Flanegin cu wega empata na 11 den extra inning unda Jomark Flanegin ta resulta e pitcher perdedor. Pizza Hut Monsters 16 careda, 6 hit, 3 error. Royal Power 12 careda, 20 hit, 5 eror. Miho bateadornan pa Pizza Hut Monsters ta Aigil Brete 4-2, Richinell Matos 2-1, Jonathan Tromp 2-1. Pa Royal Power a destaca na plato Eldrick Dijkhoff 5-4, Kelvin Silvania 4-3 incluyendo un cuadrangular den deep left, Jomark Flanegin 5-4, Giandrick Lacle 5-3. Pitchernan di Royal Power a regala 11 base por bola mas 3 dead ball mientras Matos a regala 3 base por bola mas 3 deadball. Esaki ta muestra cu e prome wega a dura algo mas cu 4 ora di partido. Despues di wega Directiva di ASB hunto cu Leadernan di Team y umpires a yega na e decision di acuerdo cu reglamento di campeonato di ASB cu no lo hunga despues di 12am durante siman y asina a pospone e di dos wega pa otro siman diaranson. E serie aki por caba den e prome partido otro siman diaranson cu un victoria di Pizza Hut Monsters pero cu un victoria di Royal Power esaki por empata forsando e wega desisivo final. Fanaticada di softball fast pitch reserve e fecha diaranson 12 di October pa e gran final di softball di Aruba. Softball fast pitch a la carga.