PARIS, Francia – Un estudio riba e efectonan di un vacuna contra meningitis a mustra datonan esperansador pa e tratamento di gonorea, un enfermedad cada biaha mas dificil pa sanea debi na e resistencia na antibioticonan, cientificonan a destaca den un estudio publica diamars.
Segun e publicacion, e individuonan vacuna cu e meningococo B, e bacteria responsabel di e meningitis, ta menos propenso cu otronan na ser infecta pa gonorea, un enfermedad transmisibel sexualmente.
E publicacion di e trabao aki den e revista medico The Lancet, a tuma luga poco dia despues cu e Organisacion Mundial di Salud (WHO), a adverti cu gonorea ta cada biaha mas dificil di trata, “incluso tin biaha imposibel,’ debi na e creciente resistencia na antibioticonan.
E estudio por otorga “un pista nobo pa e desaroyo di un vacuna,” The Lancet a bisa, cu a matisa cu actualmente e obhetivo ey no tabata facil pa logra, “apesar di mas di un siglo di investigacion.”
E datonan di e estudio ta basa riba e observacion di e resultadonan di un campaña di vacunacion contra e meningococo B na New Zealand entre 2004 y 2006, cu a involucra na mas di un miyon di pashent, AFP a splica.
Studiando e datonan di 14 mil persona, e autornan di e estudio, a determina cu e vacuna lo a reduci un 31% di e casonan di gonorea.
Aunke cu e sintomanan di e meningitis y esunan di gonorea ta hopi diferente, e bacterianan causante tin un gran parecido genetico.
“Ta prome biaha cu nos ta observa un proteccion contra gonorea danki na un vacuna (aunke) e mecanismo di e respuesta inmunitario aki na e momentonan aki no ta conoci,” un di e autornan di e estudio, dr. helen Petousis-Harris, di e universidad di Auckland, a comenta.
Segun e autornan di e estudio, lo bay ta necesrio investigacionnan nobo pa mira si e vacunanan mas reciente tin un efecto similar.
Gonorea ta un infeccion cu por afecta e organonan genital, e rectum y garganta. Ta transmiti durante relacionnan sexual, sin proteccion por via oral, anal y vaginal.
Fuente: www.eluniversal.com