LA PAZ, Bolivia – E piloto di e vuelo di LaMia cu a cay prome cu nan a baha na Medellin cu e ekipo Chapecoense tabata tin un proceso disciplinario den husticia militar. Asina e minister di Defensa di Bolivia a informa durante investigacion di e tragedia cu a sosode siman pasa.
Minister Reymi Ferreira a sigura cu e fayecido piloto, Miguel Quiroga, tabata enfrenta un proceso disciplinario door di a bandona Forsa Aerea Boliviana y cu tabata tin un orden di detencion den su contra.
E minister a bisa cu pilotonan militar tin e compromiso di cu una bes nan ta forma, nan no por retira di e institucion te ora cu nan cumpli e añanan di servicio respectivo.
Minister di Obranan Publico di Bolivia, Milton Claros, a papia cu CNN en Español di e avancenan di e investigacion di e tragedia di Chapecoense, e denuncia contra Celia Castedo, funcionario cu a autorisa e plan di vuelo y e suspension di otro funciondarionan relaciona cu e empresa LaMia.
“Nos a tuma e decision di desvincula e funcionario cu parentesco cu e gerente di LaMia,” Claros a bisa. E gerente general di e aerolinea LaMia, Gustavo Vargas Gamboa y Gustavo Steven Vargas Villegas, director di Registro Aeronautivo Nacional, di e Direccion General di Aeronautica Civil (GDAD) di Bolivia, ta tata y yiu, Gamboa sr. a confirma na CNN. E Registro Aeronautico Nacional ta aprob e licencia di e avionnan, emiti certificacion y ta monitorea e asuntonan legal cu por afecta e avionnan y e companianan operador.
Segun Claros, “e accidente por a wordo evita; tabata e decisionnan di e piloto” ta loke a hiba na e tragedia.
“Nos no ta bay encubri ningun funcionario,” Claros a bisa Patricia Janiot, presentado principal di CNN en Español.
Vuelo 2933 di LaMia no tabata tin gasolin, autoridadnan Colombiano a confirma, cu a cuestiona e rason dicon e piloto Miguel Quiroga, no a declara emergencia prome ni a baha den un aeropuerto alterno manera Bogota pa recarga e combustibel di e avion.
Gobierno di Bolivia a presenta un demanda contra e aerolinea LaMia. Claro, minister di Obranan Publico di Bolivia, a bisa cu “ya nos a wordo keha, nos ta kehando como ministerio, como Gobierno contra e empresa LaMia, mescos contra e funcionarionan,” el a wordo cita door di ABI.
Tambe el a señala cu paralelamente, a habri un investigacion pa establece e existencia di posibel vinculonan entre funcionarionan di Direccion di Aeronautica Civil (DGCA) y e empresa Boliviano di vuelonan charter, mescos con pa determina den ki termino a extende e permido di operacion.
Dicho investigacion, el a bisa, tambe ta inclui e socio, director y capitalnan di e compania, di acuerdo cu e reporte di ABI.
Entre e 71 victimanan di e accidente, tin 5 Boliviano, mientras cu 2 mas a sobrevivi. Dialuna LaMia a sigura cu nan ta colabora activamente cu e investigacion di e tragedia di Chapecoense. Den un comunicado, e empresa tambe a expresa su sentimento di dolor pa e 71 mortonan cu e accidente a laga atras: “Na e momentonan aki, LaMia ta colabora activamente cu e investigacion di e accidente na Colombia y cu autoridadnan competente na Bolivia y den otro paisnan pa compronde adecuadamente e causa di e tragedia aki.”
Fuente: CNN en Español