Pianista Jonathan Ortega a biaha pa Hulanda cu beca di Aruba Symphony Festival

0
Pianista Jonathan Ortega

Prome di Augustus e hoben pianista Arubiano Jonathan Ortega a biaha pa Hulanda caminda e lo drenta Fontys Conservatorium na Tilburg. Danki na e esfuerzonan di Johnny Croes, vice director di Scol di Musica Rufo Wever, ( y docente di Jonathan pa shete aña) durante e festival cu a termina dia 29 di juli, Jonathan a ricibi un beca di Aruba Symphony Festival pa su lesnan di e maestra Edith Peña.

Jonathan a nace na Colombia y a bin Aruba na edad di 9 aña. Na edad di 14 aña Jonathan a cuminsa les cerca Albert Croes na Scol di Musica Rufo Wever. Despues di un aña el a cambia pa Johnny Croes.

Pa e por a toca piano Jonathan mester a supera un problema fisico serio pa un pianista, aunke chikito pa otro. Su duim di man drechi ta mal forma y no ta funciona manera un duim normal (e no por a toca “den octaaf”), pero cu hopi ehercicio y perseverancia el a logra di recupera 100 por ciento uzo di e duim.

Johnny a reconoce un talento grandi den su studiante nobo y Johnny no solamente a dun’e les, el a yud’e den hopi otro manera pa e por a desaroya su talento. Jonathan a bira manera un “protégé” di Johnny Croes. Como cu Jonathan tabata traha y no tabatin un piano, Johnny a haci masha hopi pa pone un piano na disposicion di su studiante. El a regla cu Biblioteca Nacional y Cas di Cultura pa Jonathan uza nan grand piano. Jonathan tabata practica 5 pa 6 ora pa dia. Johnny tambe a pone su propio apartamento bashi na Papilon na Jonathan su disposicion na unda e tabata practica te den anochi laat, hopi biaha te 2’or di marduga!

Despues di gradua di Colegio, Jonathan a drenta Universidad di Aruba, pero el a realiza cu su pasion ta musica y musica ta su bida y el a dicidi di prepara su mes pa un bida di pianista profesional di musica clasico. Aki Johnny a conseh’e pa e cuminsa tuma les di Armand Simon kende ta na un nivel basta mas halto y cu lo por prepara Jonathan pa drenta un conservatorium. Fundacion Pa Talento Musical Donny Laclé a yuda cu un beca pa paga Da Vinci Academy.

Jonathan a keda encanta cu su lesnan durante e Festival di Edith Peña, e maestra Venezolano di piano. “No solamente cu Edith a siña mi hopi cos tocante tecnica, pero el a inspira mi y motiva mi pa mi haci esfuerso maximo pa mi yega na mi meta di bira un pianista di musica clasico na nivel mundial”.
Comentarionan di Edith Peña tocante su alumno Arubiano tambe ta impresionante. Edith a keda masha impacta pa e pasion y dedicacion cu Jonathan tin pa tocamento di piano. Edith a declara cu Jonathan tin hopi talento y cu su estudio na un conservatorium e lo por bira un pianista di nivel mundial. Edith tambe a mira loke Johnny Croes a detecta ocho aña prome.

Nuevo Mundo Foundation y Aruba Symphony Festival ta orguyoso di por a contribui un poco na Jonathan su desaroyo musical y ta dese’e hopi exito na Tilburg. [email protected]