Phryme Magazine ta lansa edicion #004

0

Groningen – Manera un custumber di cada tres luna, Phryme Magazine a lansa oficialmente su edicion number cuater ariba 25 di mei, 2018. E edicion aki sigur ta uno special dedica na tres mama hoben cu ta biba y studia na Hulanda. E tres mamanan aki, kende ta; Jeanirée Vicario Bernabela, Arantxa Maduro y Wilyenie Croes ta comparti nan experencia individual despues di a bira mama y e decision cu nan a tuma pa continua cu nan estudio na Hulanda.
Den e edicion aki tambe por tuma nota di un gran cantidad di articulo tocante demas studiantenan di Aruba cu ta studia den exterior. Algun di e participantenan den edicion aki ta entre otro; Kevin Boekhoudt, Jordy Tromp, Laura Croes, Nicole Manzo, Barbara Garcia y mucho mas. Adicionalmente, por topa cu articulonan informativo cu ta brinda algun tips esencial pa tanto grandi y chikito, manera “The five benefits of fitness” y “You better work”.
Phryme Magazine ta un revista dedica unicamente na hobenan di Aruba cu ta studiando den exterior. E prome edicion di Phryme a lansa dia 25 di augustus 2017 y ta obtenibel exclusivamente ariba www.phrymemagazine.com. E revista ta completamente na Ingles, cual ta haci’e un producto comprendibel pa mayoria persona rond di mundo. Na mes momento, esaki ta crea un oportunidad tambe no solamente pa promove Aruba su studiantenan den exterior, pero tambe pa promove Aruba como un isla turistico.
Finalmente, e team di Phryme ta gradici tur persona cu ya caba a sa di acepta Phryme como un revista nobo, y na mes momento ta invita henter e comunidad Arubano pa haci uzo di e oportunidad di registra awe mes GRATIS ariba: www.phrymemagazine.com p’asina keda bon atento di tur movecion di e revista. Pa cualkier pregunta, opinion of sugerencia, por contacta e team libremente atravez di [email protected], y sigui nan riba social media: @phrymemagazine

Comments

comments