WILLEMSTAD – E prome minister di Corsou, dr. Ben Whiteman a anuncia den un discurso na televisio diadomingo cu e conversacionnan cu e petrolera estatal Venezolano PDVSA, pa yega na un contracto nobo en cuanto e modernisacion di e refineria y continuidad di e operacionnan despues di 2019, no tabata tin resultadonan positivo. Pa tal motibo, Gobierno a dicidi no warda mas y firma un MOU cu e empresa petrolera Chines Guandong Zhenrong.
“Gobierno a otorga PDVSA un prioridad halto pa obtene claridad y logra un contracto nobo pa e operacion di e refineria despues di 2019. Esaki a wordo haci tumando na cuenta cu 2019 ta den porta y tin un cantidad enorme di inversionista interesa den inverti den e proceso di modernisacion y participa den e demas proyectonan di e sector energetico. Lamentablemente, tur esfuerso di parti di Gobierno pa concreta e proceso y alcansa un contracto nobo di huur di e refineria, no a duna resultadonan positivo.” Asina tabata e palabranan di prome minister Whiteman durante su discurso.
“E biahe di trabao pa Venezuela pa firma un MOU, tampoco a duna resultado. Ta pesey nos a dicidi di no warda mas y busca otro alternativa,” e prome minister a agrega.
Anteriormente, parlamento di Corsou a establece tres condicion na PDVSA pa continua operando e refineria. E condicionnan ta:
* Garantisa e continuidad di e operacionnan.
* Garantisa e puestonan di trabao.
* Reduci cu un maximo e impacto ambiental.
Aparentemente, no tabata tin un respuesta concreto di e parti di e estatal petrolero Venezolano, cual a hiba e Gobierno di Corsou na considera otro alternativanan. PDVSA a bin ta opera e refineria di Corsou pa casi 30 aña.
Fuente: Noticias Curazao