Peticion di IMF pa AVP yuda gobierno pa concretisa un maneho financiero

0

Dialuna ultimo un delegacion di fraccion di AVP, miembronan di e Comision Fiho di Parlamento pa Finansa Publico y Asuntonan Economico, a reuni cu e staf di IMF durante nan bishita Aruba.
Parlamentario Richard Arends di fraccion di AVP ta mustra cu a trata varios topico pa loke ta regarda finansa publico y tambe desaroyonan macro economico.
Durante e bishita aki e staff a reconoce logronan riba tereno financiero di e ultimo ocho añanan pa loke a trata e reformanan riba tereno di pensioen, SVB y APFA y seguronan social como tambe reduccion di e deficit den un tempo hopi cortico cu casi mey biyon florin y importancia di esaki pa pone nos finansa publico riba e bon caminda.
“Nos a logra di mantene nos mes na e normanan prescribi pa CAFT pa loke ta trata aña 2014 te cu 2017.
E presupuesto supletorio cu Gabinete Mike Eman II a entrega, tabata cumpli cu e normanan y cu esey nos a logra baha e deficit den un periodo di tres aña di -9.4% pa -0.5% na 2017.
Durante tratamento di e presupuesto aki, nos fraccion a cuestiona e aumento artificial di e deficit y a straña nos di ta asina dificil pa gobierno presenta un plan concreto pa yega na + 0.5%,” e ex Minister di Asuntonan Economico a splica.

“E reunion cu IMF tabatin tres punto principal cu a bin dilanti. Na prome luga nan ta reconoce un ausencia pa loke ta trata un maneho financiero concreto, tambe un maneho economico, unda nan por saca afo ki direccion e pronosticonan di crecemento economico lo bay riba termina mediano.
Tambe IMF a haci un apelacion riba nos pa yuda asisti como fraccion, e gobierno actual y a pidi nos pa asisti gobierno na yuda nan cu e forma pa nan por logra e normanan y por concretisa un maneho financiero,” Parlamentario Richard Arends a declara.
E pregunta cu e staf cu tabatin ta cu si nos ta kere cu e gobierno actual lo sigui cu e maneho financiero, den e liñanan cu ta prescribi dor di CAFT como tambe si lo sigui cu e maneho macro economico cu nos a bin ta hiba’” Parlamentario Arends a splica.
“Nos contesta tabata hopi simpel, esta cu nos no sa!”

“Nos no sa pasobra te dia di awe Parlamento no a ricibi un plan di gobernacion ainda nos no a ricibi un maneho concreto pa loke ta trata di finansa publico, tampoco nos no ricibi e maneho economico.
Si nos compara esaki cu e situacion na aña 2010, ya despues di tres luna, Gabinete Mike Eman I a cuminsa cu e prome serie di Dialogo Social. Pues por mira un diferencia hopi grandi den e accionnan di maneho cu Gabinete Mike Eman I a tuma y e accionnan cu e gabinete actual a tuma.

Nos a scucha hopi den conferencia di prensa como tambe declaracionnan di mandatarionan cu Gobierno lo no alcansa e normanan, cu lo no sigui cu e normanan stipula y hancra den ley pa loke ta trata supervision financiero temporal.
Ainda nos no a mira mucho cos y e topiconan pa loke ta trata finansa publico, ni tampoco economia.

IMF a reconoce inversionnan cu a wordo haci den e ultimo añanan cu a resulta den cinco area fisico di oportunidad economico cu nos a laga atras pa wordo ehecuta base di e 4 pilarnan nobo, industria creativo, tecnologia limpi, logistica como tambe exportacion di conocemento.
Tur e fundeshi aki a wordo confirma tambe dor di Banco Central a base di su pronosticonan pa loke ta trata aña 2018 y bay dilanti, tur esaki ta resultado concreto di inversionnan y accionnan cu ambos Gabinete bou signatura di AVP a laga atras.
E pregunta clave durante di e reunion aki tabata cu si nos ta kere cu e Gobierno actual lo sigui cu e maneho aki, cu ya caba tur esaki a wordo laga atras.

Comments

comments