CARACAS, Venezuela- Algun dia atras, e gobierno di Nicolas Maduro a firma un acuerdo cu Organisacion Panamericano di Salud, pa purba combati e realidad desalodor: e escasez di remedi cu ta entre un 85 pa 100%.
Cu mondkap of cahanan bashi di remedi cu no por haya pega na nan curpa, decenas di enfermonan di HIV a protesta diahuebs dilanti di e sede di OPS na Caracas, mei mei di un bishita di e representante di e organismo ey, Carissa Etienne.
“No mas morto, nos kier remedi”, e manifestantenan tabata grita mientras cu nan tabata pega posternan cu nomber di personanan cu e malesa di HIV cu a muri pa falta di remedi na Venezuela.
Den e protesta, e ONG Red Venezolana de Gente Positiva a entrega e Organisacion Panamericana di Salud (OPS) un documento unda cu e ta denuncia cu “mas di 80 mil persona cu HIV y AIDS ta wordo afecta y ta core peliger pa e falta di 100% di remedinan antiretroviral”.
Cu su mondkap y bril di solo, Sthefany Ramirez, di 24 aña, a yega na e manifestacion desde e stadion Carabobo, ya cu Sthefany, hunto cu varios di su famianan, incluyendo su yiu, tin HIV y ya pa un aña caba cu nan no por haya e tratamento.