Mundialmente ta celebra “Analistenweek” of tambe conoci como “Medical Laboratory Professionals Week” entre dia 23 pa 29 di April. En conexion cu esaki ta duna aprecio na e trabao cu e profesionalnan di laboratorio ta haci. “Nos ta celebra naturalmente esun di LAB HOH”, miembro di hunta directiva di Hospital, Ezzard Cilié a remarca. Desde Januari aña pasa oficialmente nan a bira un fundacion, esta Fundacion Servicio Laboratorio Medico Aruba (FSMLA), miho conoci como LAB HOH, bou maneho di e Hunta di Directiva di HOH.
“Eigenlijk e siman aki ta dedica na tur tecnico di laboratorio medico ya cu nan ta haciendo trabou cu hopi biaha nos no ta para keto na dje, pero e trabou di nan ta hopi importante y nan ta responsabel pe parti diagnostica. Si un medico no tin un diagnostico e no por traha. E siman aki ta pa nos sea consciente di dje, tambe na publico pa nan realisa con importante e trabou di laboratorio y su profesionalnan ta, sr. Ezzard Cilié a remarca. “Mi ta felicita LAB HOH pero tambe esunnan pafo di Hospital cu ta celebrando.”
E trabou di un profesional di laboratorio ta di nivel halto y cada un cu su specialismo y tarea specifico, den cual nan ta percura pa maneha un laboratorio completo. E trabou di analista ta encera cu nan ta analisa sanger, orina, af etc. y esaki ta yuda e dokternan haya un bon diagnostico, pa asina percura pa duna e pashent un bon tratamento pero tambe e ta pa prevencion di enfermedad. Mundialmente e siman aki ta duna e balor y enfoke na e trabou cu e analistanan ta haci y asina conscientisa comunidad di e importancia pa tin laboratorio y importancia pa haci testnan regularmente. “Asina ey e Asociacion Americano 42 aña pasa a cuminsa e iniciativa pa haci un LAB Week pa mas bien informa comunidad di e diferente tipo di trabounan cu nan haci”, analist Klinische Chemie & Hematologie, sra. Cyrielle Laclé-Diaz, a remarca.
Hunto cu algun colega a plania un siman di actividad entre otro a parti cupcakes y tabatin juice disponibel pa e pashentnan cu a caba di saca sanger. Entre coleganan nan a organisa un quiz unda cu a pidi tur trahado pa manda potret di nan mascota y coleganan mester a rey cua mascota ta di cua colega. Colega Debby Laclé a resulta e ganado. Banda di esaki a come hunto mainta y a organisa un ‘bustrip’na unda ta conoce coleganan mas miho den otro ambiente.
Tambe Hunta di Directiva di Hospital a saca pa prome biaha un colega di LAB HOH como empleado di luna, cu a keda den persona di Eldrich Tromp.
“Esnan di LAB HOH ta patras di e escenanan, p’esey nan a crea un slogan cu ta bisa “Behind the scenes hero.” Nan ta heroe patras di escenanan, pasobra sin nan dokternan no por haci nan diagnostico y nan no por constata kico e pashent tin, sr. Ingmar Ramharakh, kwaliteitsfunctionaris na LAB HOH a remarca. “Mi ta hopi gradici na nan.”
Pabien na tur profesionalnan den laboratorio cu nan “Medical Laboratory Professionals Week”!