For di oranan di mainta tempran a cuminsa cu un paro general caminda tabata tin 7 sede, unda cu e sindicatonan a pidi su miembronan pa bay. E 7 sedenan aki tur tabata e diferente sindicatonan, caminda cu nan a keda reparti y e 7 sedenan ey tabata e sedenan principal, segun Obri Janga a bisa Masnoticia.com.
Tin cu bisa cu e cosnan a cana basta fastioso durante henter dia. Practicamente brug di Ponton, cu tin cu habri pa barconan drenta of sali for di e bahia, a keda pa peatonnan so. Peatonnan por a bay Punda, bay bek, pasobra brug tabata para keto. No a habri laga ningun barco drenta y ningun por a sali. Barconan di fruta entre otro mester a keda drief pafo, pasobra brug tabata practicamente pa peatonnan so. Busnan no a cora at all. Tabata tin algun chauffeur di bus a core, mirando cu nan ta huur un bus y e ora nan mester paga. E ora ey e chauffeurnan di bus aki por a core, mirando cu nan tin gasto y ta huur bus pa asina na por traha y saca nan dia.
Tambe sigur por bisa cu diferente parti di Corsou, coriente a bay. Esaki tabata en conexion cu un problema cu e compania di Aqualectra a confronta y sigur pasobra, e compania aki, ora cu e makinaria ta den funcion, mester tin hende na warda pa asina controla pa tur cos canalisa netjes. E ora ey awe mainta sigur esnan cu mester a subi, no a subi y esunnan cu mester a baha no tabata por y si nan baha, nan mester a shotdown cierto makinaria, mirando cu no tin hende pa controla y tur cos cana netjes. Asina por sigui menciona cu tabata tin telefonnan, internet cu a cay afo, mirando cu coriente a cay, cierto di e kabinetnan cu ta funciona cu coriente, logicamente esun si coriente, e area ta keda sin coriente. Trafico tabata un caos completo. Manera cu conoce e crusada di Biesheuvel, ta esun di mas grandi, tabata un caos parti mainta. Ningun luz di trafico no tabata traha. Polis tabata tey na gran escala. Tur caminda tabata tin polis, den auto particular y autonan di polis tabata move tur caminda pa asina mira cu tur cos tabata cana netjes pa nada no bay for di man.
Tin cu bisa cu den oranan di atardi, polisnan a bay den e area di un di e centronan na Mariepampoen y a cuminsa cu di un manera of otro manifestantenan a cuminsa tira piedra riba e polisnan y mester a pone man duro. E lidernan tabata sa si di domina e manifestantenan y paralisa tur cos caminda cu tur cos a cana netjes. No ta un rato prome, tin cu bisa cu nan a logra haya dos sentencia na sindicatonan su fabor, anto sigur tin cu bisa cu despues di e dos sentencianan aki, despues di masha hopi tempo, hues ta dicta sentencia cu ta sali na fabor, mirando cu sindicato a actua corectamente y prudentemente. Veredicto awe na fabor di e sindicatonan, na ultimo ora, manera cu ta bisa a keda ingetrokken. Nan a para e caso. E no a tuma luga un caso mas contra e sindicato. Un rato pasa, Gobierno a manda sindicatonan pa bin sinta na mesa pa mira con ta haci, mirando cu nan tabata lomba canto di muraya, pasobra tabata tin masha hopi keho, masha hopi comerciante y no por a sali afo. Gobierno a yama un dialogo hunto cu sindicato BTC, comerciantenan, diferente partner den comunidad, a bay sinta na Cura Hulanda y aki a bay delibera y sigur a sali riba tres punto. E tres puntonan aki, nan a dialoga y yega na solucionnan. E solucion number 1, minister di Husticia lo anula e decreto si e welga stop. E ora ey sindicatonan ta sinta den dialogo aki y a bisa cu lo stop e welga, basta cu e minister anula e decreto.
E di dos punto ta, cu minister di finansas lo habri dialogo riba e ley cu a propone y entre tanto ta wanta cu e ley aki. Kiermen ta habri dialogo y ta wanta e ley, pasobra e ley aki ta un ley cu hues a bisa cu tin yen di punto cu no ta cuadra y no ta na fabor di e clase trahado.
E di tres punto, e manifestantenan a manifesta durante tres siman largo pa nan haya nan cen. Awor aki di un of otro manera, e contratistanan a bisa cu nan ta paga 500 florin. Awor aki den e dialogo a sali cu a bin 1.8 miyon pa asina paga e trahadonan di contratista. E 1.8 miyon aki, hunto cu 500 florin, cu e contratistanan mes ta paga e trahadonan, ta bay cobra nan cen. E cen aki nan a dialoga basta rato y a bin sali na cla cu e cen aki, na momento cu sindicatonan presenta un cuenta di banco e cen aki lo keda deposita prome cu diabierna merdia 12’or.
Kiermen cu sindicatonan sinta mesora a yama nan hendenan di finansas y cuenta di banco a sali y awor ta di cumpli pa pone e 1.8 miyon aki y e contratistanan tambe tin cu bin cu nan parti pa asina tur trahado ricibi nan pago.
Mirando tur e bay binnan cu tabata tin na Corsou durante tres siman largo, manifestantenan, personanan trahado cu tabata welga y tabata lucha pa asina caba cu inhusticia, manera minister Ben Whiteman a yam’e, un slavernij moderno. Esaki sigur ta kita for di mesa na e momentonan aki.