WASHINGTON D.C., Merca – E presidente di Camara di Representante di Merca, Paul Ryan, a bisa dialuna cu e no lo defende e candidato Donald Trump y lo uza e 29 dianan prome cu e eleccion na Merca pa mantene e poder di e Partido Republicano den Congreso.
E medida – hopi inusual den e historia politica di Merca – a pone na descubierto e divisionnan aparentemente sin soluciona cu awo ta aparece den e Partido Republicano un luna prome cu e eleccion presidencial. E apoyo pa Trump entre e establecimento Republicano, ya debil pa e desacuerdonan den politico y tono, a cay na nivelnan mas abao ainda.
“E presidente lo enfoca den e siguiente luna den mantene e mayoria partidario den Congreso,” e vocero di Ryan, AshLee Stron a bisa den un comunicado.
Den un reunion di emergencia dialuna, Ryan a bisa e integrantenan di su partido cu “tur tin mester di haci miho pa boso y boso districto,” un asistente di e evento a bisa.
Den un mensahe di Twitter, Trump a bisa cu Ryan tin cu concentra den otro temanan manera presupuesto, empleo y e imigracion ilegal y no “gasta su tempo bringando cu e candidato Republicano.”
“Ryan lo pone tur su energia den sigura pa Hillary Clinton no tin cu check den blanco cu un Congreso controla pa e democratanan,” e fuente a bisa, den un reconocimento implicito cu Trump no por yega Cas Blanco.
E comentarionan di Ryan a tuma luga a base di un articulo cu a keda publica den Washington Post diabierna caminda cu Trump ta papia riba punta relacionnan sexual cu un muhe casa y di por fula hende muhe. Trump a disculpa pa e comentarionan aki den e debate diadomingo, pero el a bisa cu tabata trata di un charla di hende homber, mientras cu e tabata dirigi su atakenan pa e expresidente Bill Clinton.
Ryan a laga sa bon cla cu e por stop di duna un apoyo proactivo na e candidato di su partido. Un fuente a bisa cu Ryan por haci campaña den 17 estado y 42 ciudad e luna aki.
Paul Ryan a bisa: “mi ta cansa pa loke mi a scucha awe. Hende muhenan tin cu wordo defendi y respeta, no obhetivisa. Mi ta spera cu sr. Trump trata e situacion aki cu seriedad cu e merece y traha pa demostra e pais cu e tin un mayor respet pa hende muhe, loke cu e video aki ta sugeri. Mientras tanto, e ya no ta asistiendo e eventonan di mañan na Wisconsin.”
E vocero di campaña di Trump, Jason Miller, a tweet cu despues cu e noticia a keda conoci, “nada no a cambia. Sr. Trump semper a wordo impulsa pa un movimiento di base, no pa Washington.”
Un fuente di e campaña di Trump a bisa CNN cu el a bisa hopi miembro di Congreso desde principio pa nan mantene nan cosnan den e institucion aki aunke e ta nifica bandona Trump, pues e campaña kier e mayoria Republicano na Januari, ora cu e presidente nobo tuma posesion den Cas Blanco.
E comentarionan di Trump revela pa Washington Post a genera un condena general di e lidernan di e partido Republicano.
E presidente di e Comite Nacional Republicano, Reince Priebus, a bisa: “Ningun muhe mester wordo describi nunca den e terminonan of referi na e manera ey. Nunca.”
E ex aspirante y senador Republicano Marco Rubio, a condena e declaracionnan: “E comentarionan di Donald ta bulgar, escandaloso y imposibel di hustifica. Ningun hende tin cu papia di un hende muher den e terminonan ey, incluyendo den priva.”
Tambe e exaspirante y ex gobernador di Florida, Jeb Bush, a bisa riba Twitter cu “como abuelo di dos mucha muhe precioso, mi ta kere cu ningun disculpa por excusa e comentarionan reprensibel di Donald Trump cu ta degrada hende muhe.”
Pa su banda, e excandidato Republicano John McCain a bisa cu “no tin escusa pa e comentarionan ofensivo y degradante di Donald Trump. Ningun muhe mester ta victima di e tipo di comportacion inapropia aki. Solamente e tin e responsabilidad di su conducta y solamente e tin cu sufri e consecuencianan.”
Fuente: CNN en Español