Dialuna 27 di Maart, reverendo Pastoor Rey Nares lo celebra su di cuarenta aniversario di sacerdocio. Un hubileo dedica na bida spiritual y na disposicion di cada ruman cu ta dispuesto pa sigui siñansa di Hesus. E celebracion lo tuma luga na Iglesia Inmaculata Concepcion na Santa Cruz durante un misa concelebra.
Reynerio Moresca Nares a nace dia 7 di november 1948 na Camalig, Provencia Albay na Filipinas. E ta haya su ordenacion sacerdotal na edad di 29 aña dia 26 di maart 1977, despues di diesdos aña di estudio na diferente seminario den su pais natal.
Cu apenas diesshete aña di edad e ta drenta seminario menor San Gregorio Magno na Legazpy, un pueblo situa 500 kilometro for di Manila.
Reynerio ta bini di un famia pober di cunukero. Ora el a caba scol basico, el a keda cas dos aña pa yuda traha den cunucu. Despues el a bay scol secundario Sint Benedict school. Como parti di su educacion, e mester a yuda tambe den misa como misdienaar. Aki el a haya un yamada pa bira un religioso. Pero el a duda, ya cu un estudio na un seminario ta costa hopi placa.
E scol tabata bou guia di soeurnan Aleman y nan a percura pa Rey por a haya e ayudo financiero pa drenta seminario. Tambe cu placa di collect den pueblo, Rey por a drenta seminario na 1965. Den su pueblo, Rey ta papia un dialecto y na e seminario el a haya les na Spaño, Ingles y Latin.E materianan mas pisa tabata filosofia y teologia.
Dia 26 di november 1976, Pastoor Rey ta termina su estudio na seminario mayor San José. Pastoor Rey a traha na varios parokia na Filipinas prome cu el a bini Aruba na 1991.
Aruba
Pastoor Rey a haya sa cu tin necesidad pa mas sacerdote na Aruba e tempo ey. El a haya permiso di Obispo di Willemstad mgr. Wim Ellis pa bini Aruba. Pero finalmente ta su superior, Obispo Sarte di Legazpy tabata tin e ultimo palabra pa pastoor Rey tuma despedida di Filipinas pa bin traha na Aruba.
Ya caba e comunidad Catolico di Aruba tabata haya guia spiritual di pastornan Filipino y pa menciona algun Pastoor Felix Pasadilla y Pastoor Tony Peralta, ambos awo den feliz memoria.
Tabata e temporada cu e sacerdotenan Hulandes a retira for di trabou den parokia y a bay dedica nan na trabou pastoral na Centro Pastoral Santa Cruz hunto cu laiconan.
Parokia San Francisco na Oranjestad a bira e prome parokia di pastoor Rey.
Den menos cu un aña e religioso a bin ta domina Papiamento door di bay les, scucha radio y lesa corant. Tambe e mester a saca su rijbewijs na Aruba, p’asina e por a bishita e parokianonan di Oranjestad y acudi na actividadnan den otro parokianan.
E ta conta cu desde prome momento el a sintie na cas na Aruba ya cu el a ripara un semehansa entre e cultura Filipino y esun Arubano. Ambos pais un tempo tabata bou di dominio Spaño, pues tin custumbernan comun, specialmente ariba tereno religioso. Na tur dos pais mayoria di habitantennan ta Catolico.
Pastornan Filipino na Aruba a introduci procesionnan den parokia y por a constata cu e devocion na diferente santo a aumenta. Scolnan tabata yuda hopi na formacion spiritual di e hobennan. Asina mas hoben tabata bay misa durante fin di siman.
Santa Cruz
Na 2002 Pastoor Rey a bini Santa Cruz unda ya caba e pueblo a custumbra cu e guia spiritual di religiosonan Filipino manera Pastoor Felix, pader René y pader Toti.
E pueblo di Santa Cruz a ricibi pastoor Rey man habri, specialmente pa su disponibilidad pa yuda cu proyectonan den parokia.Varios proyecto cu su antecesornan a inicia, a sigui. Por menciona renovacion di e misa,centro San Martin y cas di pastoor (pastorie). A traha un oficina pa atende publico y unspecial pa Comision di Santana. Cu ayudo di Gobierno di Aruba a percura tambe pa e parkeerplaats bira mas atractivo cu mata, iluminacion etc.
Mester menciona cu na 2007 un grupo di boluntario di Santa Cruz a tuma e iniciativa pa drecha e Santana. E luga di ultimo sosiego di e defuntonan no tabata un luga digno pa esnan cu a bay laga nos. E boluntarionan a haya autorisacion di Pastoor Rey pa expone nan plannan. Na principio e plannan a haya poco resistencia di e pueblo ya cu tabata desea pa famianan contribui cu mantencion di e santana. Pero mirando e trabou grandi cu a wordo haci pa duna e santana un miho aspecto, e parokianonan a duna tur cooperacion. E trabou di e comision di Santana na Santa Cruz a bira un modelo pa tur otro parokia na Aruba y den diocesis.
Pastoor Rey a fungi como Vicario Episcopal na Aruba for di october 2012 te cu januari 2017. Den e funcion aki, e tabata representante di Obispo di diocesis di Willemstad.
Sociedad moderno?
E hecho cu awendia, hobennan no ta bay misa hopi mas, pastoor Rey ta mira esaki no solamente como falta di guia spiritual na scol, pero principalmente na cas. Hende a bira mas materialista, libertinahe, secularismo y awendia pastoornan no ta bishita casnan di famia manera antes.
Falta di un catisashi mas moderno pa yega na curason di e hobennan y nan mayornan.
Pastoor Rey ta indica cu e sa bishita scolnan, tanto Catolico como no Catolico pa yuda den e formacion spiritual di e muchanan. Y si tin interes e ta suministra sacramento di confesion tambe na scol.
Pa loke ta e falta di vocacion sacerdotal den nos comunidad, pastoor Rey ta kere cu mester bin un campaña pa stimula esaki. Via scolnan, parokia, produci material informativo, mas catisashi pa mayornan tambe por lanta interes den nan yiunan pa bira religioso. Pero esaki no ta na Aruba so, e ta un tendencia mundial. Pastoor Rey ta mira si cu na Filipinas y Africa tin vocacion ainda.
Trabou di laiconan ta indispensabel den nos comunidad. Nan ta complementa e trabou di religiosonan cu programanan manera Encuentro Conyugal, Hijos y Hijas, gruponan di orashon, cursonan di evangelisacion etc. Pero aki tambe falta boluntarionan pa traha, specialmente hobennan pa por tuma over pocopoco e trabou di esnan mas grandi.
Pastoor ta lamenta cu ainda tin hende no ta consciente cu un hende malo mester ricibi e Sacramento di Enfermo ora e ta na tino pa e por participa na e ceremonia. Famianan no kier spanta e enfermo, pa e no pensa cu e ta bay muri. Ta sosode cu ta yama pastoor ora e persona ta muriendo of a muri caba. Apesar cu ta yam’e e ultimo Sacramento, den hopi caso un hende ta haya alimento pa su alma mientras cu e ta na bida.
Pastoor Rey ta señala cu tin hopi famia ta biba den situacionnan dificil, famianan kibra, problemanan social etc. E ta apoya e trabou di e gruponan di asistencia social den parokia ya cu nan por yuda hopi hende cu material, manera paña, cuminda y tin bes hasta paga awa of coriente.
Su deseo ta pa mas hoben envolvi nan mes den trabou pastoral den parokia. Pa nan por carga responsabilidad pa yuda nan prohimo den necesidad y traha ariba nan propio formacion spiritual.
Pastoor Rey ta dispuesto pa sigui traha pa e comunidad Catolico di Aruba, mientras cu Papa Dios dun’e bida y salud. Y ta pidi tur hende pa resa p’e, pa tur nos religiosonan pa nan por sigui guia e pueblo den e temponan dificil cu Aruba ta enfrenta.