Tin un caso sumamente delicado y tristo a tuma luga, ora cu un mucha su inocencia a wordo atacha pa un persona, cu supuestamente merece confiansa di su siguidornan. Ta trata aki di un pastoor cu a mishi cu un mucha di 10 aña. Mama di e mucha, Grislynn Hernandez, cual no ta un persona desconoci den comunidad, a haya su mes den e situacion aki.
El a splica cu su yiu a wordo mishi door di un pastoor. E tabata bayendo un creche traimerdia. Ya pa 7 aña largo e mucha ta bay eynan, pasobra nan tin confiansa completo riba e personanan aki. Desde cu e tin 3 aña e ta bayendo e creche aki. Un dia e mucha a bin tristo y a puntre ta kico a pase. E mucha mes a pidi pa hib’e na warda di polis pasobra e kier haci un denuncia y pa e mayornan tambe haci esaki. E ora a puntr’e di kico y e mucha a contesta cu a pasa algo cu no mag di pasa cun’e, cu ta un hende a mishi cu su parti intimo.
Na e momento cu el a bisa esey, e mama a coy su telefon pa grab’e, pa e tin sikiera un prueba ora cu e bay inmediatamente na polis. Berdad el a bisa cu e pastoor aki a cuminsa cu un sorto di wega, kishiki na su barica, a bay parti abao, pero e mucha tabata tin jeans bisti. Despues el a hinca man bao di su blusa, mishi cu su pechonan, tur dos y despues e mucha a keda manera den shock. E mama a puntr’e dicon e no a haci nada of algo. E mucha a cuminsa yora y a bisa cu den su mente e kier a sali for di e luga.
E pastoor a lanta y a bin bek y a bis’e cu si e por habri su boton di carson, cos cu el a haci. Y na e mesun momento e mucha a pusha su man y a bise cu no y e pastoor a sali, a para wak’e y a bis’e na Ingles pa ningun hende no mester sa kico a pasa pa no conta ningun hende loke a pasa. E ora e mucha a sali y a conta e mama tur locual cu a pasa. Cual pa e mama ta un abuso totalmente.
Esaki a pasa dos siman pasa diaranson. E mesun dia e mama a bay warda di polis na Santa Cruz y a pidi pa un recherche di biaha. A papia cu e comandante na warda, cual a bisa cu nan lo yam’e for di e departamento encarga, cual a sosode. A haya un cita pa su mainta 9’or. A haci un declaracion y a purba pa e mucha declara di biaha, pero a haya cita te diasabra, cu e personanan encarga pa mucha y despues e tata a yam’e pa declara. No por a papia di e caso tanten cu e investigacion ta andando.
Te cu ayera cu nan a detene e pastoor aki, pero e ta liber bek. E mama ta pidi encarecidamente husticia pasobra e mucha muhe a wordo viola sexualmente, drasticamente y duramente como supuestamente ley ta bisa. Pero el a wordo mishi, cual ta un abuso. E ta un intento di abuso tambe. Si no tabata tin mas hende, otro lo cos por a pasa. No sa kico mas lo por a pasa y no sa kico por ta pasando cu muchanan cu no por papia na e luga, na e creche aki.
E relacion cu e doñonan ta ok. E mucha no tin ningun problema.
E creche tin un camber di television, unda cu tin cuna di baby y e camber tin airco. E mucha tabata bezig ta wak television y e otro muchanan a bay pasobra nan mayornan a bin busk’e y e mucha a keda su so ta wak television. E pastoor a drenta puntre si tin un klechi pasobra e luga ta friu, anto e ora tur cos a sosode y e mucha a sali.
E mama a haci denuncia caba y e ta bay yega te na final pasobra hopi mama no ta papia, hopi mama ta wak cu ley no ta duna resultado como tal pasobra si tin cu bisa, ley di berdad ta demasiado debil. Den e caso aki di abuso contra menor, e mama ta duna su cara, su yiu no a wordo viola sexualmente, pero si a wordo mishi.
E kier concientisa tur mama, tur mayor, tur famia, tur amistad, pa nan papia, si nan ta wak algo asina, pasobra ta pa futuro di e muchanan e ta keda totalmente malo psicologicamente. Un mucha cu wordo mishi so, ta sufri di dje.
E mama a declara cu ya caba nan tabata colectando firma, prome cu e caso aki a touch’e personalmente. E tabata yudando Jairo Maduro, cu dos tata di famia, cu nan ta colectando firma pasobra nan ta preocupa cu e problematica grandi di abuso contra menor y na caminda e cos aki a touch’e personalmente y logicamente e ta bay diep den esaki y lo bay yega te na final.
Ta bezig ta colectando firma pa logra un cambio of un ahuste den ley contra abuso di menor. Esey tin fecha caba pa un accion di firma grandi cu ta bay tuma luga diadomingo, dia 4 di December, na Disney Recreation na Santa Cruz.
E pastoor ta liber. Hopi caso manera esaki ta pasa basta tempo pa wordo trata. Segun e mama, e ta haci e caso aki publico, pa sikiera awo cu husticia ta trahando, pa e hendenan no hiba muchanan na e creche. E mama tabata tin un confiansa y hasta por ta un amistad cu nan, pero logicamente e amistad ey ta kibra na e momento cu e mucha su derecho a wordo viola, pasobra tur mucha tin derecho.
E tin derecho cu ningun hende no mag di mishi cu nan, dokter, mama y ningun hende no mag di mishi cu parti intimo di un mucha y ta papiando no solamente di abuso sexual, pero tambe abuso en general, totalmente.
E lugar ta keda na Primavera y e yama Arca di Noe. E Pastoor yama Doodle Sophia y ta hopi conoci den nos comunidad y e yamada ta pa esey, pa e mayornan stop di hiba e muchanan eynan pasobra tanten cu ley ta andando, e muchanan ta core hopi peliger eynan.
Mientras tanto e pastoor a sali liber. Ayera, polis a yama e pastoor pa duna su denuncia y a wordo laga den libertad pero ta bao di investigacion, cual a wordo confirma pa Ministerio Publico. E persona a wordo interoga y awor investigacion ta bay cuminsa y por lo pronto ta keda un sospechoso te ora cu e caso termina. E caso ta den man di KZP hunto cu Ministerio Publico.