Carolien Broeksema ta un di e studiantenan di IPA cu a bay di pasantia. El a bay cu algun colega di dje mas, esta Lyxienne Wever, Shindy Oduber y Karen Berkemeijer, a bay bishita New York University na New York City. Nan pasantia tabata pasa riba e P di Planet mas tanto. A bay cu e intencion pa investiga e participacion cu tin den e comunidad na New York City.
Haciendo nan pasantia a ripara cu e universidad mes ta hopi mas basa riba educacion di medio ambiente y vocabulario di medio ambiente. E ora eynan, como grupo a dicidi cu tabata mas miho pa enfoca riba esaki y wak con nan ta trata esaki den scolnan basico eynan y con e participacion di e muchanan eynan mes ta. A bishita varios scol y a base di esaki a bay busca den literatura kico ta e beneficionan pa educacion tocante medio ambiente, vooral pasobra aki na Aruba, ta enfocando mas riba sostenibilidad y e importancia di esaki. Awo ta toca na e grupo pa bay bek den practica y bay siña e muchanan aki kico ta medio ambiente, kico ta e vocabulario cu ta bay hunto cu esaki, pa asina haya nan engage mas den e topico aki y participa pa duna sosten cu esaki, ya cu e futuro ta e muchanan y cu esaki e grupo di studiante kier pa bin mas participacion di mucha. E ta bay pa hende grandi y despues como comunidad, ta mas conciente di kico en realidad sostenibilidad ta, cual no ta solamente green, pero hopi mas grandi.
Broeksema a sigui splica cu loke cu por a ripara na New York, nan no tin naturalesa manera cu Aruba tin. Nos tin nos lama, nos tin nos cunucunan, nos tin nos flora y fauna. Nan tin esey tambe, pero loke ta pasa ta cu eynan nan ta bay na e luganan pa e muchanan experencia kico esey ta. Nan tin e posibilidadnan pa haci esey. E organisacion cu por haci esey ta hopi mas avansa cu na Aruba. Ta puntonan cu ta importante, pa e por wordo implementa na Aruba, pa asina bay na e luganan aki. Un ehempel ta Butterfly farm, pa habri e acceso pa e muchanan bay eynan y pa e muchanan ta den e ambiente pa siña mas miho.