Aña pasa na augustus tabata tin un candela grandi na e edificio di Pasadia Briyo di Solo, cual a causa dañonan cuantioso na e edificio. Sra. Els van Homelen ta amplia mas di con nan a logra build op e luga aki bek, cu ta un luga importante unda nos hendenan special adulto ta bin pasa dia y haci obra di man.
Despues di algun luna a logra build op e edificio bek y esey ta duna un sentimento di felicidad. Aña pasa, niun hende no tabata sa con pa sigui. Pero e team a pone man na obra y traha hopi duro pa informa comunidad di kico nan mester. Esaki sigur ta yuda pasobra cu mester di comunidad pa por lanta un luga asina bek. E team a traha duro, a pidi donacion cual nan ta gradicido pa tur e donacionnan, cu ta hopi, cu nan a ricibi. Awo e luga a habri bek y e cuido pro sigui manera cu mester ta.
Sra. van Homellen a sigui bisa cu tabata hopi duro, ay cu a dura un par di luna prome cu nan a keda cla cu seguro. Pero den e lunanan aki, nan kier a gradici Sr. Franklin Bareño, cu a pone Britannia disponibel, pa asina e cuido di e clientenan por a sigui. Esaki ta importante pa e famianan, ya cu nan mester traha y ta importante pa nan por sigui cu nan guia den dia. Esey a yuda nan hopi. Despues nan a sigui cu e reconstruccion, hunto cu e LGO cu a haci e trabaonan di reconstruccion, hunto cu nan Bouwkundig Adviseur, Sr. Lionel Mercelina y Sr. Anthony Kock cu tabata responsabel cu e coriente. Asina a logra pa e edificio por habri bek, hunto cu tur e sponsornan.
Tin a duna placa, otro a bin yuda, a duna serbete. Cada cos chikito a yuda hopi pa nan por a logra habri bek. Pa loke ta material cu a wordo perdi, algun cos por a wordo drecha. Kiwanis Young Professionals a bin yuda tambe pa verf e luga y tambe e mueblenan.
Aworaki, tur cos ta up to date, e coriente ta gekeurd. Te ainda nan no sa e motibo di e candela, pero e biaha aki nan a pone hopi enfasis ariba e parti di coriente.
Por ultimo, Sra. Homelen a gradici tur esunnan cu a duna un man pa asina Pasadia Briyo di Solo por a habri bek na su localidad di semper. Sin e apoyo y sosten di e comunidad, nan lo no por a logra.