Por wak cu na Aruba Airlines tambe ta hayando problema serio pa cual aki Sr. Glenbert Croes ta splica mas di desaroyonan di preocupacion cu tin na e momento aki bou di e trahadonan. Partido MEP ta dunando atencion na Aruba Airlines, pa e crisis cu nan ta pasando aden. Esaki ta un situacion fastioso ya cu ta dos aerolinea nacional, cu ta den problema.
Sr. Croes a haci un apelacion ariba Departamento di Aviacion Civil, ariba propio pregorativo y propio responsabilidad, sin pidi permiso di e Minister di Transporte actual cu no tin atencion pa cu e caso aki, pa por fabor tuma carta den e asunto na Aruba Airlines. Ora un aerolinea ta pasando den problemanan financiero, hopi biaha siguridad den aviacion ta bira un discusion. Algun dia pasa e aerolinea aki no por a bula ariba Corsou, pa motibo cu e pagonan no a wordo haci pa uza e espacio aereo di Corsou, despues e pago aki a drenta. Fraccion di MEP ta na altura cu accionistanan di Aruba Airlines ta interferi den decisionnan, cu ta pone den discusion siguridad den aviacion y criterio y huicio di vuelonan cu mester tuma luga. Sr. Croes kier pa pueblo compronde cu niun accionista, mandando un mensahe di apoyo pa e trahadonan cu tin Aruba na pecho, cu por pone un trahado tuma un decision cu ta pone na peliger e siguridad den aviacion.
Si tin algun trahado cu kier haci un bon trabao den siguridad di aviacion, ta wordo menasa pa accionistanan y esey ta inevitabel. P’esey un apelacion na Departamento di Aviacion Civil, pa tuma carta den e asunto aki. Trahadonan tin e obligacion pa e pais, pa e pueblo y e industria di aviacion, pa e responsabilidad cu tin pa preserva e categoria 1 como pais, pa informa autoridadnan unda cu accionistanan ta purba interferi cu decisionnan cu no ta nan responsabilidad. Tambe Sr. Glembert Croes a splica cu el a bin compronde cu ta kitando yiunan di tera, pa pone otro hende cu si ta bay na amen di e accionistanan pa laga algun vuelo sali mientras cu ta existi cierto riesgonan.
Partido mep ta hopi precupa pa loke ta pasando tanto den Insel Air y Aruba airlines paso e parti di siguridad ta importante pa tene esaki na cuenta segun Sr. Croes. E realidad ta cu tur hende sa cu no por spera for di gobierno di AVP, cu nan lo bay defende derechonan di trahadonan. Ya caba a mira e situacion di Westin y tambe Aura Casino, con gobierno a laga e trahadonan cay. Y no por spera cu e gobierno aki tuma parti pa niun trahado, ya cu nan semper a tuma parti pa e doño di trabao. partido MEP, como e partido di pueblo trahado lo keda vigilante di e proceso aki, pa sigura cu di ningun forma pa trahadonan cumpli cu nan deber den bon forma, no wordo menasa door di niun accionista.
Sr. Croes kier pa henter pueblo sa cu accionistanan di Aruba Airlines y Insel Air por tin influencia den AVP, pero nan no tin influencia den MEP, pa cual nan si ta sali nan interes di dos punto importante, cualnan ta siguridad den aviacion permanentemente no por sacrifica e interes ey. Tur operacion mester opera na un manera sigur y di dos, mester cumpli cu e trahadonan, ya cu semper accionistanan ta lanta bela bay, sin paga e trahadonan salario, manera ta tumando luga na Insel Air. Aruba mester di e aerolineanan aki, pa desaroya e industria turistico. Bou ningun circunstancia por permiti ningun aerolinea perhudica e bon nomber di e pais, siguridad den aviacion, e siguridad di e pueblo pasahero y e siguridad di trabao di e trahadonan. Asina Sr. Glenbert Croes di Fraccion di MEP a finalisa bisando.