JERUZALEM, Israel- E encuentro amistoso cu lo mester a tuma luga na Jeruzalem tampoco a scapa di e conflictonan politico cu e region ta confronta.
E partido amistoso entre Israel y Argentina, cu mester a tuma luga dia 9 di juni proximo na Jeruzalem, a wordo suspendi.
Esaki lo mester tabata e ultimo encuentro di preparacion di e ‘albiceleste’ na caminda pa Mundial di Rusia. Pero e encuentro deportivo no a scapa di e conflicto entre Israel y Palestina, cual a bira pio den e ultimo simannan.
Diamars, mas di un decena di persona a reuni dilanti di e Compleho Deportivo Joan Gamper di F.C. Barcelona, unda cu e selección Argentino tabata realisando un sesion di training, pa reclama pa Argentina no hunga e wega amistoso na Jeruzalem.
“Nos ta pidi Messi, pa tur loke e ta representa mundialmente, pa e no bay Israel”, Omar Garcia, un Cordobes di 49 aña, a bisa. “E partido lo wordo hunga na Al Malha, un zona di Israel construi riba pueblonan cu a wordo basha abao. Argentina no mester bira cara e otro banda pa loke a pasa eynan”, e manifestante a denuncia.
E stadion Teddy Kollek di Jeruzalem ta den un bario lanta riba e ruinanan di un pueblo Palestino, despues di e guera Arabe- Israeli di 1948.
Sin embargo, loke mas a hala atencion di e protesta tabata e flanelnan cu a manifestantenan tabata tin bisti. Tabata parce como sifuera nan tabata mancha cu sanger.
Minister di Deporte y Cultra di Israel Miri Regev bisa cu e partido a wordo cancela door cu e hungadonan Argentino a ricibi menasanan di “gruponan terorista”.