Den rueda semanal di prensa Lider di PDR Andin Bikker a menciona cu pueblo di Aruba a haya derecho di voto pa Parlamento Europeo via un test case haci pa minister presidente y minister Benny Sevinger, y e ta welcome, pero no tin mucho cos pa logra cu esaki.
Andin Bikker a splica cu esun cu ta tumando decisionnan cu ta afecta nos país directamente y cu a conduci cu prome minister a bay den welga di hamber dos aña pasa, ta Gobierno di Reino. “Pero nos no por vota pa Tweede Kamer, pasobra na final di dia e ministernan di Reino y tambe esnan Plenipotenciario alabes ta Ministernan di e Gabinete Hulandes.
Nan ta bisti y tin doble funcion y nan ta wordo controla door di Parlamento Hulandes” Bikker a splica.
Lider di PDR a menciona cu hopi biaha preguntanan ta bin den Tweede Kamer riba asuntonan di Aruba, pero Aruba no por haci mesun cos riba asuntonan di Hulanda. Parlamento kier haya derecho di haci e minister plenipotenciario preguntanan cu ta regarda nos pais y a bisa cu den Hurisprudencia, den articulo 3 di protocol EVRM ta bisa cu asina un organo cu eigenlijk ta uno cu ta goberna, bo tin derecho di controle tambe via e derecho democrático di voto.
Andin Bikker a bisa cu e ultimo añanan Gobiernonan a bin cu decretonan contra Aruba, Sint Maarten y Corsou respectivamente.
“Aworaki cu a habri registracion pa por vota pa Tweede Kamer, teoreticamente tambe por aplica pa por vota for di Aruba, pero nan a nenga y nos por apela. PDR ta evaluando esaki seriamente, pa Aruba por opta pa su derecho di voto pa Tweede Kamer, Gobierno Hulandes por tuma decision riba Aruba y nos pais tin nada di bisa”, Andin Bikker a amplia.
Segun Bikker te dia di awe nan ta bringando pa e schillenregeling cu nos pais no a haya, pa cual for di aña 1992 tin firma un protocol y den e documento ey ta para cu nan ta bay bin cu un schillenregeling pero nos tin fe 2016 y te ainda nada y awor el a bin compronde cu esaki ta bedrijfgeheim.
Contestando un pregunta di prensa tocante e hecho cu esaki a ser trata den IPKO ultimo reunión, Bikker a bisa cu si y cu sr. Plasterk a traha un concepto di ley pero el a haya un kebrante di salud y posiblemente te November por tende riba esaki. El a bisa tambe cu PDR su iniciativa di bin cu un test case ta sigur na su luga, y cu ya caba e islanan BES ta vota. Si Aruba, Boneiro y Corsou logra esaki Hulanda lo bay pone mas atencion riba e pueblonan aki.