E siman aki a cuminsa reunionnan di parti di informador, caminda a sinta cu cuater partido politico, esta MEP, POR, RED y AVP.
Diamars a toca na partido AVP pa reuni cu informador. E tres representantenan di AVP, Sr. Benny Sevinger, mr. Arthur Dowers y ing. Mike de Meza a informa informador cu nan tin interes pa forma un coalicion cu MEP. Diaranson durante e reunion cu informador a informa e lider di MEP, cu AVP tin interes pa forma un coalicion cu MEP. Tambe a informa lider di partido POR, cu AVP a mustra interes pa forma un coalicion cu partido MEP pa e proximo gobernacion 2017- 2021.
Di parti di partido MEP nan no ta kere cu esaki ta e miho opcion na e momentonan aki mirando cu Aruba ta confrontando cu su retonan financiero cu mester bay traha ariba dje, causa pa e mesun partido AVP. DI parti POR, a compronde e rumornan cu tin ariba caya, cu AVP kier forma un coalicion cu partido MEP. Pero partido POR a tuma nota cu varios coordinador, cu ta cerca cu algun minister di AVP, ta acera partido POR pa forma un posibel gobierno cu partido AVP.
Pero POR ta prefera di analisa e desaroyonan prome cu partido MEP pa despues tuma un decision. Esaki sigur ta hala atencion, ya cu nunca den 31 aña di Status Aparte, nunca e dos partidonan grandi a mustra interes pa traha hunto. E pregunta ta keda aworaki, dicon awor si AVP lo kier sinta hunto cu MEP,
y mirando e retonan cu pais Aruba tin ariba tereno financiero.
Masnoticia.com lo sigui e desaroyonan di cerca den e proximo dianan, pa loke ta e decisionnan di e partidonan cu ta interesa pa forma un gobierno, cu ta MEP, POR y RED. Tambe lo sigui AVP di cerca, pa wak kico ta bay ta nan comentario despues di e siman aki, cu informador mr. Arie Swaen lo acerca gobernador di Aruba.