For di dia 7 di November Parlamento ta den reunion y a trata tur e presupuestonan y a tuma dos dia pa trata esun di asuntonan general, unda cu minister presidente a bin defende su presupuesto y despues a bay na votacion. Segun presidente di Parlamento, Mervin Wyatt-Ras, a keda presenta 41 mocion di cual por bisa 32 por a haya un acuerdo cu otro y eynan por a mira cu Parlamentarionan cu tur e diferencianan cu tin entre e diferente fraccionnan, pero toch a haya pa 32 mocion cu tur a bay di acuerdo pa pasa nan unanimamente door di cual no mester a menciona tur, sino lo a sali mas laat for di Parlamento.
Tabata tin otro mocionnan tambe cu a vota e ora separadamente. Tabata tin 9 mocion cu por a haci uzo di e stemmotivering, tur hende por a bisa nan opinion y a vota, pa dos di nan tambe, unanimamente.
Por bisa a bin 25 mocion di AVP, 13 di MEP, 2 di PDR y 1 di Parlamentario independiente. Por bisa cu durante e presupuesto aki, tabata un preocupacion di hopi Parlamentario e deficit financiero. Gobierno a trece padilanti cu ta cumpli cu e norma di 0.5%. Sinembargo di parti di oposicion cu tabata tin preocupacion.
A papia di salubridad publico cu ta un topico hopi al dia y semper ta un topico di discusion den parlamento y aki tambe a trece dilanti e preocupacionnan y tambe cosnan positivo por ehempel e asunto di hospitaol, a wordo discuti, e asunto di e leynan cu a wordo pasa den Parlamento pa mehora e calidad di cuido di nos pashentnan. Akinan tambe tin e preguntanan pa asina ehecuta e leynan aki tambe. Inspeccion di salubridad, ta algo cu hopi biaha a papia di dje. Presidente di Parlamento den un comision cu el a lidera a yega na cierto proposicionnan y esakinan tambe a wordo cuestiona. Ta e hecho pa asina sigui cu esaki mas pronto cu ta posibel. Baby Lunah tambe tabata un issue hopi importante pa wordo discuti, unda cu e diferente parlamentarionan a trece nan punto di bista y toch a bin mocionnan al respecto cu a keda acorda. Pa loke ta trata enseñansa tabata un topico hopi comenta, unda cu e preocupacionnan a bin tambe pa e cantidad di muchanan cu ta keda sinta, con pa haci esaki mas miho, minister mes a introduci e hecho cu den eerste klas no ta keda sinta mas y toch a bin preguntanan al respecto.
Tambe e scolnan cu mester atendi cu nan, pa drecha e scolnan, e leerstof, e diferente mehoracion di e infrastructura di e scolnan. Banda di esey tambe tur e Green Corridor a bin den discusion, unda cu e ta algo bon, pero toch tin pregunta al respecto. MFA nan cu ta algo hopi bon cu e pueblo ta bay ta mas cerca tambe di e diferente instancianan cu ta duna servicio.
Tin hende cu ta wordo stimula pa bay traha, tin cantidad di persona cu ta cobrando bijstand. Akinan Gobierno tambe a menciona diferente beneficio pa e hendenan aki, subiendo ahustacionnan, bijstand a subi, kindertoeslag, pa nos grandinan, pero toch miembronan di parlamento di oposicion toch tin pregunta encuanto di nos muchanan, abuso di mucha caminda cu mester pone mas atencion riba dje, entre otro.
Pa loke ta trata husticia tambe ta algo cu a papia hopi den Parlamento y por bisa cu parlamentarionan a haci pregunta y ora trata presupuesto di husticia, hopi parlamentario no a haci mucho pregunta mas, pasobra a trat’e varios biaha den Parlamento. Ta keda si cu e minister mester bay ehecuta loke ta palabra.
Tabata tin un grupo di manifestante cu a bin cerca minister y diferente acuerdonan a wordo haci y esey lo keda vigila como Parlamento.
Por bisa cu esey ta un paar di e presupuestonan cu Wyatt-Ras a menciona.
Wyatt-Ras ta contento cu dado momento e Parlamentarionan a uni pa cierto di e mocionnan. All in all e tabata fructifero y tambe e forma cu esaki a wordo maneha tabata hopi bon. A reuni cu e lidernan di fraccion unda cu a palabra 90 minuut den prome tanda y 45 minuut den segunda tanta. Ora cu wak bon cuanto tempo a uza en total, a resta minuut, pasobra e ta toch largo si wak’e bon. Door di esaki tambe, Griffier a tene bista riba e minuutnan y tur parlamentario tabata mas conciente con pa uza nan minuut pa papia y a bay mas al caso durante e preguntanan cu a haci. Por a obliga ministernan tambe di ta al caso, door di bisa nan por ehempel e parlamentarionan a haci solamente 30 pregunta y tin un ora y mey pa contesta. A haci cu e prome siman a bay hopi vlot. E siguiente siman a bay hopi vlot, pero pa ora cu a yega na e presupuesto di asuntonan general, hopi pregunta a cay. Mester a duna e minister di asuntonan general e tempo pa contesta y ta tratando full e presupuesto. A tuma tempo pe. Wyatt-Ras ta satisfecho con esaki a bay y dado momento por wak cu palabra cierto cosnan, por ta aki aya parlamentario ta critica, pero toch ta bisa cu el a yuda structura con ta reuni a base di e agenda.