Largo bay nos ta tende Minister Eman papia riba sostenibilidad di nos Pais y cuanto esfuerso su Gobierno ta haciendo pa nos Pais por ta sostenibel na 2020. E mandatario aki a biaha rond mundo pa gaba cu e vision aki y bende mundo e idea cu Aruba ta un paraiso sostenibel. Esaki ta nada mas cu un farsa, ya cu un Pais sostenibel mester por tin sikiera un dump cu ta traha na drechi. Locual ta e dump na Parkietenbos ta leu di por yuda pa nos hendenan, flora y fauna na nos Pais pa por ta sostenibel. Mandatarionan mester duna cara y trece solucion pa e problema grandi aki pa nos Pais.
Negligencia
Desde 2013 Minister Eman a percura pa haci propaganda rond mundo pa mustra cu den Reino Hulandes tin un Pais, Aruba, cu ta haciendo todo por todo pa ta sostenibel na 2020. Pero e realidad na nos Pais ta uno completamente otro. Nos ta leu di ta sostenibel. Cosnan basico, manera produci nos mesun cuminda y deshaci na un forma drechi di nos desperdicio haciendo uso di por ehempel reciclahe keto bay ta wordo neglisha. Sigur pa locual ta trata nos dump tin un negligencia grandi y esaki ta afectando e salud di nos hendenan, nos flora y fauna, cu ta pone cu nos ta keda lew di ta un Pais sostenibel.
Un solucion sabotia
Na 2009 tabata tin un solucion pa sikiera paga e candela y reduci e sushi na dump, pero esaki a wordo deliberadamente sabotia pa Gabinete Eman y awe nos Pueblo ta paga un prijs halto. No solamente un inversion di 28 miyon di placa di Pueblo ta bay perdi, pero e negligencia aki ta costando e salud di hopi hende cu ta biba y traha den e vecindario di e dump. A priminti un solucion pero 7 aña largo nada a wordo haci pa drecha e dump pa alivia e molester y peliger cu e ta trece cune pa hende y medio ambiente.
Mester duna cara pa un solucion
E situacion di nos dump na Parkietenbos no por sigui asina. Gobierno no por sigui ignora e peligernan Ministernan Eman, Sevinger, De Meza y Schwengle mester duna cara aki y trece dilanti kico ta nan solucion pa e problema aki. Ya caba 7 aña a pasa y ta basta. Nan no por keda sconde cara neglishando salud di hende y nos medio ambiente mas. Un Pais sostenibel mester tin sikiera un dump cu ta traha na drechi.