Siman pasa Parlamento a trata e Citgo deal pa por haci e reapertura di e refineria posibel den forma di un mehorado di crudo. Banda di e preocupacion expresa riba e parti financiero, nos a haci pregunta riba e risiconan cu tin pa nos medio ambiente y kico Gobierno lo haci pa mitiga esakinan. Mester bisa cu e Ministernan a keda basta ‘vaag’ den nan contestacion por escrito y tambe durante e reunion publico. Na nos opinion un Gobierno berde mester por duna mas informacion riba e parti medio ambiental cu ta toca e refineria.
No a atende cu preocupacion di Raad van Advies
Raad van Advies den su conseho na Gobierno a dedica 2 pagina y mey pa cuestiona e aspectonan di medio ambiente di e Citgo deal. Raad ta indica, por ehempel, cu no tin un bista concreto ta cual norma lo wordo usa pa midi si e trabounan cu ta wordo haci durante e periodo di rehabilitacion y despues ta wordo haci na un manera cu ta limita daño ambiental. Gobierno di su banda a dedica solamente 4 frase pa indica cu ta despues nan lo tuma un decision kico lo wordo haci pa mitiga posibel daño ambiental. Di e manera Gobierno no a atende cu e preocupacion treci dilanti pa Raad van Advies.
Ta schuif responsabilidad den scochi di Citgo
Un otro preocupacion cu a bin dilanti ta e landfill (dump) cu Citgo lo usa pa deposita e desperdicio di su produccion. Minister De Meza den su contesta a indica cu e landfill aki lo wordo traha y maneha pa Citgo. E mandatario a indica cu no lo benta material peligroso aden, tampoco material cu por kima, no lo benta azeta aden, no lo benta quimico aden, pero kizas ta beton, carton y asbest lo tira den e landfill. Pues Minister De Meza mes no por a bisa cu siguridad kico lo wordo benta den e landfill aki y ta djis schuif e responsabilidad den scochi di Citgo.
Un Gobierno berde mester por ta mas concreto
E ta remarcabel cu Gabinete Eman cu ta profila nan mes como un Gobierno cu un vision berde y sostenibel, ta asina poco concreto ora cu ta trata e aspecto di medio ambiente cu ta toca e refineria. Sigur si nos tene na cuenta cu Minister Eman largo tempo a haci trabou di loopjongen pa Reino y bishita yen di foro internacional como modelo di e vision berde y sostenibel, awe ora ta toca e refineria na Aruba a keda asina ‘vaag’ riba e aspectonan di medio ambiente. Aki ta na unda cu Ministernan Eman y De Meza mester por tabata mas concreto pa demostra cu nan a haci todo por todo pa di antemano haci un deal na fabor di e medio ambiente di nos Pais y no djies lage den man di Citgo pa dicidi na kico nan lo kier tene nan mes den ausencia di un ley cu ta proteha medio ambiente na Aruba. Un Gobierno berde mester por tabata mas concreto y mester por duna mas informacion riba e parti medio ambiental cu ta toca e refineria.