Diahuebs siman pasa Parlamento di Aruba a ricibi e rapport cu Algemene Rekenkamer Aruba (Controlaria General) a traha basa riba nan investigacion di e Cuentanan Annual di Gabinente Eman pa aña 2015. E organo halto di control aki ta indica cu Gabinete Eman no por controla su gastonan di gobernacion locual ta pone e sostenibilidad di e finansas publico di nos Pais na peliger. E debe substancial, e gastonan di interes haltisimo y e gastonan relata na personal ta tres elemento cardinal na unda cu consnan a bay for di man.
Megadebe
Controlaria General ta conclui den su investigacion cu Gabinete Eman no a haci mucho pa controla e gastonan relata na e MEGADEBE cu nan a crea. E debe di nos Pais ta uno substancial, e ta core den 4 biyon florin cu ta pone cu ya caba di cada florin, 83 cent ta bay pa paga debe y riba cabes di cada cuidadano ta colga un debe di mas di 36 mil florin.
Gastonan di interes
Un otro gasto cu Controlaria General ta indica cu no a wordo debidamente controla, ta e gastonan di interes cu ta relata na e debe cu nos tin como Pais. E MEGADEBE aki ta trece gastonan halto di interes cune, na 2015 e gastonan di interes a surpasa 200 miyon florin. E gastonan aki tin cu wordo paga for di bo presupuesto cu e consecuencia cu bo ta resta menos placa pa por gasta na e asuntonan mas necesario na bienestar di e hendenan di nos Pais, manera por ehempel salubridad y pa combati criminalidad. Pa duna un comparacion, Controlaria General a indica cu den 2015 Gobierno a gasta 150 miyon na gastonan pa Salubridad y Cuido di nos Grandinan, cual ta 50 miyon menos di locual nos ta paga na gasto di interes. Den e mesun aña, Gobierno a gasta 120 miyon na gastonan di Polis y prison pa atende cu criminalidad na nos Pais, cual ta 80 miyon menos cu e gasto di 200 miyon paga na interes pa e MEGADEBE.
Gastonan di personal
Gabinete Eman no a sa di controla e gastonan di personal siendo cu esaki ta e gasto di mas grandi pa e Gobierno di nos Pais cu ta core den 34% di tur gastonan. For di e investigacion ta sali na cla cu Gabinete Eman a haci fiesta cu arbeidscontractant na e buronan di Ministers, na unda di 328 trahado, 230 tabata arbeidscontractant cu no a pasa ningun screening di e Departamento di Recurso Humano di Gobierno, siendo cu nan so ta costa nos Pais 31,3 miyon na salario y beneficio.
Parlamento mester controla
Controlaria General den su rapport a urgi Parlamento di Aruba pa haci uso di instrumentonan disponibel pa controla Gobierno ya cu e gastonan ta bayendo for di man cu consecuencia severo pa e sostenibilidad di e finansas publico di nos Pais. Y aki nos mester agrega, cu consecuencianan devastador pa e cartera y e sostenibilidad di e Pueblo di Aruba, ya cu si Gabinete Eman no controla su gastonan y e Parlamento di AVP sigui tapa y bati man pa nan, ta e Pueblo aki lo wordo castiga cu medida locual no ta husto.