Awe 26 di November 2015 nos ta recorda e di 30 aña di fayecimento di un gran estadista, lider y Libertador di nos Pais, Sr. Gilberto François (Betico) Croes. E persona cu danki na su lucha y determinacion awe nos Pueblo por biba den e libertad cu ta permiti nos tin un Aruba desaroya na unda nos solamente e yiunan di e tera aki, pero tambe tur cu a bin duna nos un man, a sa di disfruta di e fruto di e trabou inmenso cu sr Betico Croes a haci pa nos. Na Aruba nos tin hopi pa ta gradicido na Betico y tur cu a yud’e firmemente den e lucha pa nos libertad cu awe nos Status Aparte ta brinda nos. Betico a laga un legado unico pa e generacionnan di nos Pais, el a siña nos cu union y determinacion nos ta logra biba den libertad.
Union na bienestar di nos Pais
Betico Croes a laga nos cu e ehempel cu nos por logra hopi pa nos Pais si nos por ta uni. Sigur na e momento aki den historia, e ehempel di union por yuda nos Pueblo grandemente. Betico a mustra nos cu e voz di un Pueblo uni por logra cosnan grandi, manere entre otro nos Status Aparte cu a trece tanto bienestar pa nos Pueblo. Si nos keda keto nada lo cambia. Pues nos mester sigui e ehempel di resona nos voz den union si nos kier logra cambionan na bienestar di nos Pais.
Determinacion pa logra
E lucha di Betico pa Status Aparte no tabata facil y a conta cu hopi sacrificio. Pero Betico a laga e ehempel atras cu si bo ta determina bo ta logra. Betico den su lucha a topa hopi contratiempo y a lucha contra contrincante poderoso, pero e no a perde fe of sinti’e intimida. Su determinacion pa logra bienestar pa su Pais a yude logra. Nos mester sigui e ehempel aki di no cansa di lucha pa nos bienestar y di nos yiunan. Cu determinacion nos ta logra.
Libertad ta bale la pena
Danki na Betico y tur esnan cu a yud’e den su lucha, awe nos por sa kico kiermeen biba den Libertad cu e Status Aparte ta brinda nos. E libertad pa nos por dicidi pa nos mes, no ta algo asina comun. Pero Betico a mustra nos cu ta bale la pena e esfuerso pa tuma e responsabilidad pa por biba den libertad. Pesey na momento cu mishi cu e libertad aki nos mester uni pa stop cualkier cu ta menasa di kite for di nos.
Ban sigui Betico su ehempel
Awe cu nos ta recorda Betico Croes su fayecimento laga nos reflexiona riba e ehempelnan cu el a laga atras pa nos. Ban percura pa como Pueblo nos sigui su ehempelnan y conserva tur locual el a logra pa nos cu su lucha incansabel.