Parlamentario mr. Xiomara Maduro: Aruba mester wordo goberna y representa dignamente

0

Siman pasa nos Gobernador Boekhoudt a tuma sufuncion oficialmente y a presenta su mes na e comunidad Arubano durante un recepcion ofreci na ocasion di Aña Nobo. Remarcabel ta cu pa e recepcion aki full Gabinete Eman y mayoria parlamentario di AVP tabata ausente. E motibo ta conoci, Minister Eman ta busca tur manera pa mustra su disgusto pa nombracion di e Gobernador nobo pa nos Pais. Nos ta condena e actuacion infantil aki di Minister Eman, pasobra comoProme Minister di Aruba, Minister Eman y su bende mester cumpli cu nan tarea di representa gobierno y parlamento dignamente na ocacion di un recepcion asina. Tur cu ta sigui e mal ehempel di Minister Eman faltando respet cu nan ausencia, mester corda cu nan ta faya di representa Aruba dignamente.

Eman a faya
Desde 2014 Minister Eman ta poniendo e cara di nos pais na berguensa. Prome cu su welga di hamber y awor cu tur e comportacion baho y infantil rond di e nombracion di Gobernador. Minister Eman tabata sa di antemano cu Hulanda no a aproba e personanan cu el a sugeri pa e funcion y a indica di tempran cu lo nombra otro persona. Pero ta bisto cu Eman kier a purba haci aya locual e ta haci aki, esta core pa e problema of locual no ta den su straatje door di bay subi palo di luz, verf den bario of bay piki sushi cu Serlimar pa wak si e por haya su kier, pero Eman a faya. Ni cuanto el a sapatia y ni cuanto campania sushi el a hiba pa desacredita e candidato nobo, e no a logra.

Laga kier y beis na cas
Minister Eman y su bende mester compronde cu nan tin un funcion como Prome Minister y Ministernan di e pais aki pa cual nan mester cumpli cun’e y e cumplimento aki no ta condiciona na beis of kier. Si bo ta Prome Minister, bo mester actua y atene bo mes como tal. Cos di beis of infantil mester wordo laga na cas. Locual cu Minister Eman y su bende a demostra na Parlamento y na e recepcion di Gobernador ta gewoon un infantilismo sin precedencia cu mester wordo condena pa Pueblo di Aruba den su totalidad.

Goberna y representa Aruba dignamente
Nos pais mester wordo goberna y representa dignamente. Na man di Gabinete Eman, Aruba no ta wordo respeta ya cu Minister Eman y su bende ta laga hopi mes di desea. Tanto cu Eman ta gaba cu e tin bon relacion cu Hulanda y hasta cu Cas Real, awe nos Pueblo por wak e realidad, Eman su actuacion ta pone cara di Aruba na berguensa y ta pone nos den un spot na unda cu Aruba ta wordo ridiculisa. Pesey pueblo di Aruba, e aña electoral aki ban libra Aruba di Gabinete Eman y laga nos pais conoce atrobe un Gobierno cu por goberna y representa Aruba dignamente.