Durante un entrevista Parlamentario, sr. Guillfred Besaril, a duna su opinion riba e mocion number 36, presenta y sosteni pa Fraccion di AVP durante tratamento di Presupuesto 2017 den Parlamento. Sr. Besaril a declara lo siguiente.
“E mocion number 36, presenta durante tratamento di Presupuesto 2017 pa Fraccion di AVP, no ta nada otro cu un deseo na bombardia e derecho sagrado di privacidad cu tur ciudadano tin riba nos pida baranca! E mocion en cuestion ta asina amplio, cu Fraccion di MEP a keda sorprendi cu un documento importante asina por a sali di un grupo den cual ta milita tanto hurista como Parlamentario cu experiencia amplio.
E documento mas bien ta refleha un gana na contribui na e desaster cu tin awor den e maneho general di prevencion y combatimento di criminalidad pero sin mishi cu e persona responsabel pa e maneho, esta e ciudadano Minister di Husticia!
Tur hurista sa cu tin leynan manera e ordenansa di Polis (APV), articulonan den otro ordenansanan mane esun di Permiso (Vergunning-) y di Molester (Hinderverordening) cu ta regla tur autoridad necesario pa controla.
E problema ta sinta den e aspecto di duna contenido na e tema siguridad y orden publico. Pues e mocion di AVP ta innecesario, no ta contribui na resolve e situacion actual y e documento por lo tanto ta digno di kibra y benta afor!
Fraccion di MEP ta cla pa sostene cualkier deseo cu ta tangibel, cu realmente ta contribui na ataca e situacion actual di falta di siguridad.
Si e mocion tabata contente punto manera entre otro:
* den 100 dia Prome Minister y Minister di Husticia ta bin pa dilanti y ta splica Pueblo den ki forma lo duna e acuerdo di dia 13 di October 2016 (10 miyon Florin) contenido;
* den 100 dia ta bin bek cu e servicio di helicopter;
* den 100 dia ta regla e autoridad di esnan cu ta labora den Warda Nos Costa (WNC);
* den 100 dia ta regla pa esnan cu ta labora na WNC sali cu man duro na nos costanan;
* den 100 dia ta atende cu Kustwacht riba e tema radar y tuma un rumbo concreto;
* den 100 dia ta presenta un concepto di maneho den cual comunidad ta haya vigilancia stuctura tanto den su barionan como den area turistico;
* den 100 dia ta instala un comision cu e tarea di presenta un proposicion pa flexibilisa ordenansa di orario di trabou di polis y otro instancia den husticia,
E ora sigur e deseo (mocion) lo a conta cu e aprobacion di Fraccion di MEP den Parlamento. Nos ta sinti cu e ora porfin Parlamento lo a asumi su rol di control y di duna indicacion caminda cu Pueblo ta exigi cu indicacion mester wordo duna na Gobierno. Siguridad y trankilidad di nos comunidad no ta un punto di discusion den cual “Wega Politico” por wordo permiti!
E ta un tema serio cu merece na wordo atendi cu respet. Un tema den cual esun cu a faya no por wordo absolvi di su responsabilidad por medio di un amienda tipo “Shredder” mane cu AVP a presenta y sostene durante e tratamento di Presupuesto 2017.” Parlamentario Besaril a termina.