Parlamentario sr. Guillfred Besaril a tuma nota di e sucedido recien den un establecimento den area di South Beach caminda e situacion a bay formalmente for di man na momento cu autoridad a bay controla e restaurant/club nocturno aki.
En bista cu ainda Ministerio Publico ta den pleno investigacion di e sucedido, señor Besaril ta opta na abstene di duna comentario riba locual a sosode den e localidad en espera di e resultado final di e investigacion. Locual si e Parlamentario a remarca ta e importancia pa comerciantenan como bon ciudadano mantene nan mes na locual ta stipula den nan permiso.
“Cada comerciante ta haya un permiso pa opera nan negoshi y e tin cu mantene su mes na locual ta stipula den e permiso aki. Esaki no ta solamente necesario den cuadro di e control y regulacion cu mester tuma luga, pero tambe pa siguridad di e propio comerciante. No ta desconoci pa un y tur cu tin un cantidad grandi di atraco cu ta tumando lugar den e ultimo tempo. Aruba ta den un “High Season” di criminalidad cu ainda no por yega su fin. Den varios caso esaki kisas lo por a ser preveni door di e propio comerciante si e la tene cuenta cu diferente factor entre nan e orario di ciere di nan negoshi. Mas laat un negoshi dal porta cera, mas grandi e chens ta pa anti-socialnan pasa comete nan fechorianan treciendo no solamente e comerciante sino tambe su clientela den e negoshi na peliger.
E stipulacionnan den tur permiso mester ser respeta bou di tur circunstancia pa asina e comerciante mes yuda salguavardia su siguridad y di esnan cu ta bishita su establecimento. Laga nos, specialmente den e temporada aki di Pasco y Fin Aña, coopera y respeta tur autoridad manera Polis, Douane, DTI, Brandweer den nan tarea di control y den un forma harmonioso yuda stimula un ambiente, un Pais mas sigur” Parlamentario Besaril a termina.