Parlamentario di Fraccion di MEP, Sr. Glenbert Croes den conferencia di prensa di diaranson ultimo a duna di conoce cu MEP no tin confiansa den Gobierno pa trece un solucion pa cu e situacion alarmante di dump. Sr. Croes ta expresa su confiansa den Serlimar pa trece un solucion pa dump bou di guianan necesario.
Nos a ricibi informacion cu Gobierno lo ta trahando comisionnan pa studia e solucion pa e problema di e dump na Parkietenbos. Pero nos di MEP kier expresa categoricamente cu nos no tin confiansa den Gabinete Mike Eman 2 cu awor den porta di eleccion kier gaña busca solucion simplemente pa stunt politico.
Ocho aña AVP no a haci nada pa soluciona e problema di dump, y awor Gabinete Mike Eman 2 kier tira santo den wowo di pueblo gaña traha comicion comosifuera cu awo si lo logra un solucion. Esaki ta meramente zet politico pa haci promocion cun’e.
Di parti di Partido MEP nos kier expresa cu nos confiansa ta den Serlimar mes pa nan trece un solucion pa dump bao di siguiente“guidelines”:
– Solucion pa dump na Parkietenbos y su costo no por trece cun’e mas medida contra nos pueblo, pasobra nos pueblo no ta wanta mas castigo di tur e medidanan cu ya Gabinete Mike Eman a bin cun’e.
– E solucion pa dump na Parkietenbos mester garantisa e futuro existencia di Serlimar como nos compania nacional di servicio y limpiesa.
– E solucion mester duna tur e trahadonan di Serlimar: garantia di trabao, garantia di salario y garantia di pensioen.
MEP ta propone pa Serlimar mes forma su comision tecnico interno, cu representantenan di trahadonan como miembro, hefenan di departamentonan di Serlimar como miembro, y directiva di Serlimar como miembro. E comision tecnico interno aki di Serlimar lo tin tur confiansa di MEP pa nan mes propone diferente opcion pa solucion defintivo pa e problema di e dump di Parkietenbos.
MEP no tin confiansa den Gobierno di AVP, MEP no tin confiansa den AVP, pasobra despues cu 8 aña cu Gobierno a sinta man crusa sin haci nada pa soluciona e problema, awor 8 luna prome cu eleccion kier gaña traha comision pa gaña bisa cu bo ta buscando solucion? Esaki ta condenabel y inaceptabel”, Sr. Glenbert Croes ta conclui.