Diadomingo ultimo tabata un diadomingo bastante pisa cu diferente actividad. Desde mainta tabata tin acto protocolario pa cu Dia Nacional di Portugal, weganan deportivo, atardi fiestanan cultural Portugal, actividad di Filipina den preparacion pa celebra nan 120 aña di independencia, actividad na Cas di Cultura pa nombra algun. Mas cu claro Gobierno y Parlamento a reparti e trabow pa purba ta presente na tur actividad. Endy Croes a representa Minister di Deporte Danqui Oduber na veld di Monserat pa asina lansa e prome bala mainta 10am prome cu weganan di Allstar Game a inicia. Allstar Game den edadnan 5-6 y 7-8 den un ambiente total bon anima cu hopi sosten di mayornan y familianan. Palabra di pabien na organisadornan kendenan desde Maart ta ocupando nan mes cu e campeonato aki cual porcierto diasabra awor lo termina cu diferente weganan pa campeon riba veld di Monserat. Juni Rafini entreotro ta un di e motornan tras di e campeonato aki hunto cu su querido papa. Sigur palabra di motornan manera Sonali y Swinda kendenan ta e combinacion perfecto den bar y cushina. Hopi bunita tabata ta mira e enthousiasmo cu nos chiquitinnan tin batayando contra otro. Sigur Gobierno lo duna sosten na veld di Monserat na su debido tempo. Endy Croes ta termina bisando cu e ta orguyoso di por mira e actividadnan pa nos muchanan cual ta fungi como un tarea adicional formando nos muchanan den caracter y disciplina y un miho ser pa nos comunidad di Aruba. Pabien y hopi exito.