eddybriesen2
Parlamentario Eddie Briesen no por a kere su oreanan ora cu el a scucha colega Parlamentario Juan David Yrausquin ta papia cu Gobierno di Aruba mester reduce su gastonan cu un minimo di 75 miyon florin pa logra su metanan. Parlamentario Briesen ta haya esaki straño y ta haya cu e Parlamentario di AVP ta toca y baila riba su mesun ritmo.

E Parlamentario di AVP ta bisa cu falta sigur 75 miyon florin pa yega e metanan financiero di e aña aki pero den mesun rosea e ta bisa tambe cu ainda Gobierno no a entrega e presupuesto. Ta con e Parlamentario por sa anto ta con grandi e buraco cu mester yena ta? Cada biaha por mira cu Parlamento no tin un bista riba e situacion financiero di Aruba. Ta bin cantidad di edificio aserca y hala di otro proyectonan mas. Segun Parlamentario Briesen, proyectonan ta lanta manera paddestoel y niun hende ta bisa algo ni cuestiona di unda e placanan ta bin. E Gobierno aki ta traha sin pia ni cabes, segun e ex Minister di MEP.

Gobierno ta pura pa e leynan cu a keda acorda den e Dialogo Social keda implementa pa asina haya mas placa den caha. Eddie Briesen no ta compronde con parlamentario Yrausquin ta papia di yena buraconan financiero si ni un bista cla di e situacion financiero tin.

Tempo di MEP e fraccion berde tabata critica y lastra tur Minister y awendia nan ta actua pio y ta entrega cosnan laat sin por splica drecha di unda e placanan ta bin ni unda nan ta bai. Awor aki e Minister di Finansa Mike de Meza ta casi 6 luna laat mientras cu e mes den pasado tabata lastra Minister Nilo Swean pa a entrega presupuestonan un paar di dia laat. Riba dje Raad van Advies a bisa cu ningun presupuesto cu e Gobierno actual a entrega tabata bon y e presupuesto supletorionan tabata mas diki cu e presupuesto mes.

Parlamentario Eddie Briesen a sigui splica cu e Gobierno aki ta gasta placa pa loco y despues kier sonde tras di un presupuesto supletorio. E Parlamentario ta puntra su mes si e Minister di Finansa actual por wak su cara mainta den spiel sin sinti remordimiento pa su mal maneho. Parlamentario Eddie Briesen a bisa cu e fiesta di e Gobierno di AVP lo caba e aña aki na momento cu lo kibra tur piñata prome cu eleccion. E fiesta di hinca hende tur caminda den Gobierno sin cu tin placa pa paganan, mester caba. Fiesta di coordinador mester caba e aña aki, asina Parlamentario Eddie Briesen a finalisa bisando y el a añadi cu e Parlamentario di AVP Juan David Yrausquin no sa conta drechi paso e 75 miyon florin cu e ta papia di dje, ta mucho poco pa yena e buraco astronomico cu AVP ta lagando atras den caha y presupuesto di Aruba.