PHILIPSBURG, St. Maarten- Parlamentario Chanel Brownbill di St. Maarten diamars a keda condena na 18 luna di prizon, di cual 15 ta condicional. Tambe e lo mester cumpli cu trabao pa comunidad di 240 ora.
Brownbill a wordo condena pa a evadi tanto inkomstenbelasting como omzetbelasting. Corte a tume hopi na malo, cu siendo miembro di parlamento e no duna claridad di e hechonan durante tratamento di e caso.
Corte a haya proba cu Brownbill deliberadamente a faya di declara inkomstenbelasting y omzetbelasting di mas di un miyon dollar den recibonan paga pa St. Maarten Harbour Group of Companies na e cuenta di banco di Country Construction company’s bank account. E pagonan aki na e compania, di cual e parlamentario ta e unico doño ta data di 2009 te cu 2016.
Inmediatamente despues, Brownbill y su abogado, Safira Ibrahim a entrega su mocion pa apelacion.
Durante e tratamento di e caso dia 29 maart, Ministerio Publico a exigi un castigo di prizon di 18 luna y un pago di 250 mil florin na daño, mas dos aña di prueba.
A pesar di a priminti di ta habri riba e caso, e parlamentario constantemente tabata haci uzo di su derecho di mantene silencio. Contrario na otro defendidonan den e caso, Brownbill a faya di duna un bista riba su accionnan, y tampoco a duna muestra cu e ta arepenti, según Corte.
Ministerio Publico specificamente a bisa durante tratamento di e caso, cu Brownbill lo no wordo persigui pa falsificacion di recibonan, pero ni esaki no por a persuadi e parlamentario pa renuncia na su derecho di mantene silencio.
Fuente: https://www.thedailyherald.sx