E ultimo añanan EHRM (Europees Hof voor de Rechten van de Mens) a trata algun caso hopi interesante pa loke ta relacionnan di mes sexo. Esun mas conoci y mas menciona ta e caso di Oliari contra Italia (21 Juli 2015) unda ta analisa e deseo di parehanan di mes sexo pa sea casa of cera un convenio di pareha legalmente reconoci. E caso aki a resulta den un sentencia sumamente interesante y importante, unda cu e corte a dicta cu e ausencia di un forma legal pa reconoce relacion di parehanan di mes sexo ta un violacion di e derecho pa respeta bida priva di persona y famia manera regla den articulo 8 di e Convencion Europeo pa Derechonan Humano.
Den dos otro caso anterior Shalk y Kopf contra Austria y Vallianatos y otronan contra Grecia a extende e nificacion di e principionan di e convenio menciona pa cu personanan den relacion stabil di mes sexo. Den tur e casonan aki Corte Europeo pa Derechonan Humano huesnan a focus riba e realidad social di e paisnan den cuestion y e ley den e diferente paisnan. Asina por a determina cu e diferente paisnan Europeo tin e obligacion positivo pa provee tal derecho nan tur su ciudadanonan. Conclusion tabata pa e motibo ey cu e respet pa bida priva y di famia no ta existi y no ta garantisa ora cu parehanan di mes sexo no tin oportunidad igual pa cera un union civil of convivencia di pareha registra (geregistreerd partnerschap) ya cu nan no por casa. E huesnan a enfatisa cu tin un conflicto entre e realidad social y e leynan vigente ya cu parehanan di mes sexo ya ta den relacionnan stabil y cu compromiso na otro.
Loke esaki ta nifica pa Aruba ta eigenlijk mescos: e realidad na Aruba ta cu mas cu 55 pareha di mes sexo ya ta biba casa cu otro. E cantidad di parehanan cu ta bay casa afo ta creciendo hopi mes for di momento cu a bira posibel pa casa na Boneiro. E promedio ta for di aña pasa ta 2 pareha homosexual Arubiano ta casa pa luna na Boneiro. Ademas di esaki tin un cantidad grandi di parehanan di mes sexo cu ta biba cu otro y a forma famia stabil. Esaki ta un realidad cu semper a existi pero nunca no a para pa e relacionnan aki wordo respeta y wordo protegi. Te awo. E situacion na Aruba unda cu ya ta existi matrimonionan di mes sexo, aunque no por casa aki na Aruba mes, ta ainda mas den conflicto cu nos leynan cu tur e otro paisnan Europeo.
Como pais cofirmante di e Tratado Europeo di Derechonan Humano y mirando e echo cu nos ta ainda parti di reino Hulandes y cu Arubianonan ta ciudadanonan di Union Europeo, nos gobierno tin e obligacion pa cumpli cu e sentencianan di Corte Europeo pa Derechonan Humano. Ademas di esaki nos Constitucion ta obliga gobernantenan pa nos discrimina ningun persona cu ta biba riba e pais aki. Ta awo na Gobierno pa cumpli pa loke nos como un estado di derecho ta pare pe: igualdad y zero-discriminacion.