Dia 5 di October na Aruba nos ta conmemora Dia di Maestro. Un dia hopi significativo pa esnan cu, manera ami, a disidi di tuma e responsabilidad di yuda educa nos futuro generacion.
Pero kico ta e rol di un maestro den nos sociedad actual?
Den e mundo globalisa cu nos ta bibando aden, nos mester hendenan prepara pa realisa e rol di guia cu ta move nos comunidad na un mihor futuro, cu lo lanta e interes di haya mas conocemento cerca e hobennan pa asina nan educa nan mes y keda leu for di ignorancia.
E rol cu un docente tin den un comunidad ta sumamente relevante, di tal manera cu e no por keda ignora.
Nos ta bibando den un sociedad cu aunke nos ta gosa di un nivel halto di tecnologia y multiculturalismo, nos ta carese di educacion adecua.
Globalisacion a trece cun’e exigencianan educativo vooral den e ambito tecnologico, y aunke technologia a avansa inmensamente durante e ultimo decada, pa algun e no ta facil pa adapta nan mes na e cambionan, pero pa otronan e ta precisamente un aliado educativo.
Un docente ta hunga un rol sumamente importante den e bida di e alumno y ta pa e motibo cu nos no por keda sin dun’e su relevancia necesario.
Un docente tin e deber di expresa su conocemento y demostra su capacidad di capta e atencion for di esnan cu e tin bou di su responsabilidad.
Mester tene na cuenta si cu e falta di motivacion di parti e hobennan pa siña no ta cay totalmente bou di e responsabilidad di un docente. Pero parti di e trabou como maestro ta di motiva su alumnonan, propone tecnicanan nobo di enseñansa pa asina logra un cambio den e “lifestyle” di hobennan studiante y asina yuda forma hendenan responsabel y cooperativo pa nos comunidad.