Na bispo di tratamento di ley di CITGO, mi kier tuma e tempo pa felicita pueblo di Aruba y muy specialmente San Nicolas, pa cu e gran logro di e reapertura di nos refineria.
E reapertura di Aruba su refineria no solamente lo trece placa den caha di Gobierno, pero e lo ta e rosea positivo cu pueblo di San Nicolas tanto tabata mester.
Trahadonan di tur parti di nos isla lo ta rumbo pa p’ariba di brug y consecuentemente esaki lo tin un gran impacto positivo pa comercio di San Nicolas. E crecemento economico na San Nicolas, danki na e apertura di CITGO, lo duna como resultado un crecemento den e area laboral como cu lo crea mas empleo den diferente area na San Nicolas. Seguramente lo tin e facilidad pa esnan cu ta biba p’ariba di brug haya un trabou mas serca di cas tambe y esey ta un otro bentaha pa San Nicolas.
Arubianonan den exterior finalmente lo por bolbe bek nan isla y asina reunifica famianan cu pa añanan largo mester a biba leu di otro.
E noticia aki kisas lo a yega hopi laat pa esnan cu ya no por a cumpli cu nan debenan, pero pa otro nan e ta yega net na tempo. Pa e gran mayoria e lo ta un alivio grandi y ta kita un presion enorme riba nos economia.
Awe e mesun hendenan cu kier pone fiesta grandi pa celebra reapertura di nos refineria, ta esnan cu kier a desmatel’e y bend’e pa hero bieu. Pero danki na e pueblo di Aruba cu a pone preshon riba Gobierno, lagando ningun otro opcion pa nan cu haci tur diligencia necesario pa pone e refineria bek den funcionamento.
Asina ta, un palabra di pabien na e pueblo di Aruba.
Pabien San Nicolas, esaki ta un logro di boso y pa boso!
Un biaha mas a keda demostra cu ora pueblo lanta y papia, no tin ningun politico cu lo por bay contra e deseo di un pais.