ACEH, Indonesia- Diabierna autoridadnan a castiga publicamente varios pareha namora y presunto trahadonan sexual pa violacion di e ley islamico. E parehanan a wordo gezweep. Asina AFP a informa.
E acto publico a tuma luga dilanti di un meskita den e capital, Banda Aceh, dilanti di mas di mil espectador cu tabata “burla y grita insultonan” na e personanan condena. Tres homber y cinco muhe a wordo gezweep pa a “viola e ley religioso door di mustra afecto publicamente of di a ofrece servicionan sexual online”, e agencia ta detaya.
E escena a tuma luga solamente un siman despues di cu e provincia a compromete su mes di no organisa mas castigonan publico y a prohibi cu esakinan wordo graba pa wordo difundi despues.
Di otro banda, e vice alcalde di Banda Aceh, Zainal Arifin, como defensa a bisa cu e hecho aki di diabierna no tabata pa desafia e normanan nobo. “Nos ta compronde cu e ley ainda no a drenta na vigor y e prizon ainda no ta cla (pa ehecuta e zweepmento). P’esey ainda nos ta haci’e den publico”, Arfin a declara.
E provincia Aceh ta un di esunnan mas conservador di Indonesia y e unico cu a aplica e ley di ‘sharia’ of e ley Islamico. Rond di 98% di e teritorio ta mara na e ley religioso, cu ta duna e tipo di castigonan aki.
Gruponan di derechonan humano a ridiculisa e practica di castigonan como cruel. Aña pasa presidente Joko Widodo a pidi pa pone fin na e practica di castigonan aki na Aceh.
Fuente: AFP