SANTIAGO, Chile- Dies aña di prizon pa contrabando di persona y otro cinco pa trafico di migrante. Esaki ta e sentencia emiti pa e Tribunal Oral Penal de Osorno, na Chile, contra e pareha Ecuatoriano forma pa Rosa Tambaco Morales y Cesar Cabascango Pachito.
Nan dos a ricibi e condena unanime di tribunal pa delitonan cometi entre augustus 2015 y april 2016.
E pareha lo mester paga tambe un total di 50 unidad tributario mensual pa delitonan di contrabando y trabao forsoso. E pareha a hiba tres hoben for di Otavalo (Ecuador), pa Chile, pa nan traha como bendedor den puestonan informal. Pero nan no a cumpli cu e pago priminti di 150 dollar mensual, cuminda y regularisacion migratorio.
Niun di dos hoben a ricibi e pago acorda y nan documentonan a wordo deteni pa e dos acusadonan. Un di e grupo a logra regresa su pais cu yudansa di su famianan, pero e otronan a wordo someti na regimennan di diesdos hora di trabao sin dia di descanso ni tampoco pago.
Ademas, nan mester a drumi na e luga di trabao, unda nan tabata come y baña. E situacion iregular a wordo descubri na april 2016 durante un control migratorio. E fiscal di Rio Negro a destaca cu ta prome biaha cu ta dicta un pena di prizon pa delito di contrabando di persona, door di e poco hurisprudencia cu ta existi na Chile.